Tun thal chho atang khan National Highway 54, Lunglei to Tuipang inkar Black topping hna chu ngawrh taka thawh chhoh zel a ni a, fur ruahtui tlak hmain a thui thei ang ber thawh zawh hman tuma hma lak a ni.

He hna thawk tura Central sawrkarin a ruat Bengal Prakalba Ltd in a thawh leh theih tak loh avanga rei tak a khaihlak hnuin Mizoram sawrkar ngenna angin Contractor thar ruahman a ni a. Lunglei leh Lawngtlai khawchhung, CYLA Hall inkar Lunglei EE, PWD Highway hnuaia enkawl zawng chu GP Project pek niin an ni hian hna an tan nghal a, tunah hian CYLA Hall atanga a let zawnga thawkin Km 7 an Black top zo tawh a, hmun dangah side drain te, kawngchhuat siam rual leh han tul dang engemawzat an thawk mek a ni.

CYLA Hall atanga Tuipang inkar Lawngtlai EE, PWD Highway hnuaia enkawl hi RDS Limited ten an thawk thunga, Lawngtlai khaw chhung kawng tihzauh hna thawk nghalin chhun zan zawmin an bei mek a ni. Lawngtlai khawchhung CYLA Hall leh Chawngte Peng inkar hi kawng sir tawna zauh tura ruahman niin ngaihpawimawh hmasaka neih a ni nghe nghe. Lawngtlai leh Zero inkar, 45 kms bikah hian Black topping mai bakah kawng tlahniam pawh siam that vek tura ruahman a ni a, fur hmaa a thui thei ang ber zawh hman tumin an bei dawn a ni. Tin, Zero khua leh Tuipang inkar, 42 Kms bik thawk turin RDS Ltd hian an khawl leh hnathawktute a tir tawh bawk a ni.

Lunglei EE, PWD Highway Pu Pazawna leh Lawngtlai EE, PWD Highway Pu Lalrinngheta te chuan chak taka hna thawh zel tum a nih thu sawiin mipuite chu hnathawktute tawiawm a, hnathawh tibahlah thei zawnga insak, kawng kama bungraw dah leh harsatna dangte siam lo hram turin an ngen a ni.