No.620/2021-2022

Aizawl, 21^st May, 2021 : World Health Organization (WHO) chuan Mizorama COVID-19 hri kai damlo oxygen mamawhte hman tur Oxygen Concentrator 150 Mizoram an rawn pe a. Vawiin chawhnu khan Mizoram secretariat kawtzawlah Health Minister Dr R.Lalthangliana’n heng oxygen concentratorte hi Dr Lalhlimpuii, Surveillance Medical Officer, WHO,India, Aizawl hnen atangin a dawng a ni. Health Minister hi Pu R. Lalramnghaka, Special Secretary, H&FW department-in a tawiawm a ni.

Dr. R. Lalthangliana chuan World Health Organization (WHO) in Mizorama hripui vanga damlo te mamawh pawimawh tak mai oxygen concentrator 150 lai min rawn pek avangin Zoram mipuite aiawhin thinlung takin lawmthu ka sawi a ni, a ti a. Heng khawl hlu takte hian nunna tam tak a chhanchhuak ngei dawn a ni, a ti bawk.

Health Minister chuan WHO hnen atanga kan thil dawn hi tum khata oxygen concentrator kan dawn tam ber tum a la ni, a ti a. A hmain ram hrang hrang - Switzerland atang oxygen concentrator 100, Ireland atangin 60. United kingdom atangin 50 leh Taiwan atangin 15 kan lo dawng tawh a, Egypt atangin Oxygen Cylinder D Type 50 leh Oxygen Regulator 50, Switzerland atangin Oxygen Nasal Canula 5000 leh Power Adapter 100 kan lo dawng tawh bawk a. Tunah hian Kuwait atang Oxygen Cylinder Pellet 4 (180 cylinders), Spain atangin Oxygen Nasal Tube 900 leh USA atangin Viral Transport Media Tube 300 kan dawng leh dawn a ni, a ti bawk.

Dr. R. Lalthangliana chuan World Health Organization (WHO), Country Office for India hotute hnenah vawiin khan lawmthu sawina D.O. Letter thawn nghalin,  Mizoramin COVID-19 hri dona kawnga hma a lak dan leh hnathawh dan chi hrang hrang a tarlang a, Mizoramin kan mamawh em em PPE kit, RAgT kit leh RT-PCR test kit kan mamawhna sawiin hengte hi a tam thei ang ber min rawn ngaihtuahsak turin a ngen nghal a ni.

World Health Organization (WHO), Country Office for India hotute chuan Mizoramin COVID-19 hripui a dona kawnga theihtawp a chhuahna chu an hriatpui thu leh lawmawm an tih thu lehkha rawn thawnin, Mizoram mipuite tan an ding reng a ni tih an sawi a, COVID-19 hripui leng vanga nunna chante an ui thu leh an chhungte an tawrpui thu an ziak a. COVID-19 hripui leng dona kawnga hmalakna chi hrang hrang an neih thu ziakin, he hrileng vanga nunna chan an tlem theihnan kawng hrang hrangin theihtawp an chhuah reng tih an rawn ziak a ni.