Vawiin hi World Intellectual Property Day a ni a, hemi pual hian Directorate of Science & Technology Office, Chaltlangah hun hman a ni.

He hun kaihruaitu Dr. R.K. Lallianthanga, Chief Scientific Officer chuan Intellectual Property Rights lama hmalakna chungchang hi Mizoram Sorkarin Science & Technology kuta a dah angin theihtawpa hma lak chhoh mek a ni a. Nikum chhung khan Patent pariat register fel a ni a, Trade Mark pawh pakhat register a nih tawh thu sawiin, tunah hian Science & Technology-a Patent Information Centre thawhpui turin Mizoram University-ah leh College hrang hrang pathumah IPR Cell din a nih tawh thu a sawi. World IP Day hi kum 2000 atang khan World Intellectual Property Organisation (WIPO) bultumin khawvel hmun hrang hrangah hman tan ni a, Mizoramah chuan tun hi kan vawi hnih hman ve na a ni a, hetiang lam kawnga hmasawnna a chak zawk theih nan leh mipuite hrilhhriatna atan hma lak zel tum a nih thu a sawi bawk.

World IP Day hi kumtin thupui bik neiin hman thin a ni a, kumin thupui chu ‘Digital Creativity : Culture Reimagined’ tih niin, thupui hi Pu Samuel Lalmalsawma, Scientific Officer, Patent Information Centre chuan a sawifiah a. Digital technology lama hmasawnna nasa tak avangin kan nunphungte pawh a lo nuamin a lo danglam nasa ta hle a, kan hnathawh dan phungah te pawh hmasawnna nasa tak hmuh theihin a awm a. Thuziah lamah te, music leh film industry-ah te phei chuan khawvel ram changkang zawk a mite pawh kar lovah ram kilkhawr zawk a mite pawhin kan lo nei ve thei ta zel a. A pawimawh ber chu hetiang ang thil siamchhuaktute hian a hma aia tha zawk an siamchhuah zel theihna atan an thil siamchhuah atangin hlawkna tha tak an hmuh ve a ngai a, chumi atan chuan mipuite pawhin a siamchhuaktute neitu nihna humhalh sak a, an hlawkna tur te pawh kan ngaihtuah pui a ngai a ni, a ti.

He inkhawmah hian Directorate of Science & Technology Officer leh staff te, MIRSAC Scientist leh staff te leh Mizoram Science, Technology & Innovation Council-a Officer te leh staff te thahnem tak an tel a ni.