Vawiin khan Information & Public Relations (I&PR) Minister Pu Lal Thanzara chuan I&PR Conference Hall-ah Mizo feature film sawm (10) thlanchhuah hnenah promotional cash assistance Rs.40,000 theuh a hlan.

Pu Lal Thanzara chuan I&PR hnuaia Mizoram Film Development Society (MFDS) a lo din chinah Mizo film industry-in hma a sawn a, an taimakna leh thawhhona chuan rah duhawm tak chhuah mek zelin film chu thalaite tana eizawnna tlaka siam turin nasa zawka ke pen puiah film siamtute a sawm a ni. Film chu art leh science thiamna tangkawpa siam a nih avangin a siamtute an pawimawh hle a, pawl anga hmalakna a pawimawh rualin mimal anga dingchhuak turin hmathlir leh khawhawi tihzau a tul hle, a ti a. Thiamna tak tak pawchhuak turin Mizo thalaite chu phai rama film Institute thaah te zir chhuak ve thei se, Mizo history leh thawnthu hrut tel chunga Mizoram pela film siam tura an ngaihtuahna seng turin I&PR Minister chuan a sawm a. A hmanna tur dik taka hman chuan khawtlang nun kaihhruaina kawngah thil tangkai a nih hriaa tan la zel turin Pu Lal Thanzara chuan film siamtute a chah a ni.

I&PR Director Pu Jim K.Chozah pawhin thusawiin film chu mipui rilru sukthlek dan a chhe lam leh tha lama sawi danglam theitu hriamhrei; a changa min nuihtir a, a changa min veltu, mite thinlung tiphura chawktho thei a nih avangin tunlai khawvel hmasawn zelah ngaihthah chi a ni lo, a ti. MFDS kaltlangin sawrkar chuan Mizoramah film tha zawk tihchhuah a nih theih nan hma a la a, kum hnih thum chhungin film entlak engemawzat tichhuak tawhin film lam kaihhnawiha inhmangte tan workshop, training, feature film competition, short film competition leh programme pawimawh dangte huaihawt a ni tawh, a ti.

Nodal Officer Pi Lallianpuii, I&PR Deputy Director kaihhruaiin promotional cash assistance hi film thlanchhuah sawm hnenah I&PR Minister Pu Lal Thanzara’n a sem a. Film-te hi I&PR hnuaia din Film Certification Committee in a thlan leh endikte an ni. Cash assistance dawngtute chu - C.Hmingthangvunga siam ‘Tluangtei’, ‘Zodinpuii’ leh ‘Khuanu Samsuih-I’ te; Lalawmpuia Khiangte siam ‘Beiseina in’; C.Lalvunga leh Jerry Lalngaihzuala siam ‘NH 54’; Lalduhkima Khiangte siam ‘Hmangaihna Rinawm’; KC Zoherliana siam ‘Inhlanna’; Lalmuanpuia Renthlei siam ‘Khua Ruatloh’ leh ‘Kawl Eng’ bakah VL Peka Zote siam ‘Bumna Rah’ te an ni. Heti hian MFDS din chinah promotional cash award hi Film 13 hnenah pek a ni tawh a ni.

Film siamtute hnena promotional cash assistance hlanna programme hi I&PR Secretary Pu B.Lalthanliana’n a kaihruai a, I&PR Jt. Director Pi Lalnithangi’n lawmthu sawiin hun hnung a khar a ni.