Nimin 25tn April 2016, khan Pu P.L.Thanga, Member Secretary, State Planning Board leh NLUP Board Vice Chairman leh Minnesota University mithiam - Dr. Karlyn Eckman leh Prof. Dean Current te chuan Pu P.L.Thanga Office ah NLUP kal tlanga Minnesota University leh Mizoram University thawhhona an sawi hova. Kum 2013 atanga tun thlenga he thawhhona in rah a chhhuah mek bakah University pahnihte thawhhona kalphung (model) hi tha bera an ngaih avangin Minnesota University chuan khawvel ram hrang hranga an hmalakna atan kan MZU leh Minnesota University thawhhona model hi an hman turin an rel fel tawh a ni tih Dr. Karlyn Eckman hian a sawi.
Minnesota University leh MZU te thawhhona thuthlung hi August 2016 hian tawp tur a ni a. Kum 2015 ah Dr. Karlyn Eckman Mizorama alo zin in kal zel dan tur sawihona neih a ni a, Pu Lal Thanhawla, Chief Minister in thawhho chhunzawm zel tha a tih avangin Minnesota University chuan thawhhona chhunzawm zel turin an rawn rel fel ta tih a sawi bawk. MZU thuneitute pawhin chhunzawmna atan hna kal lai bawhzuina tur leh hmathar lakna tur ruahmanna an lo siamsa avangin tluang takin thawhhona hi chhunzawm zel tura rel a ni.
Kum 2014-a ‘Pa’ ei vanga mi 8 zet an thih hnu khan Mizoram ‘Pa’ zir chianna nei turin Minnesota University ah John Zothanzama, Asst. Prof, Environment Science Dept., MZU chu June 2015 ah Minnesota University ah ‘Pa’ chungchang thlakhat training a nei a. Mizorama alo kirleh hnu hian ‘Pa’ research hi Minnesota University leh MZU thawhhona hnuaiah kalpui zel a ni.
Tun hnaia mihring ei loh chi ni a rin ‘Pa’ (Mushroom) an ei vanga boral nia rin chungchang sawi ho a ni a. Mizoram University-a laboratory leh a hmanrua atanga DNA test duhthusama ala that tawk theih loh avangin Minnesota University Laboratory leh mithiamte hmanga Mizorama ‘Pa’ zirchianna, kalpui tura sawi ho a ni. Mamit District-a ei chi loh nia rin ‘Pa’ hi Dr. Karlyn Eckman hian America a Minnesota University Laboratory ah en chian turin a keng thla dawn a ni. Mizoram chhunga Laboratory ah ‘Pa’ endikna khawl tha a awm hma chuan Minnesota University-a Laboratory hmangin ‘Pa’ chungchang zirna hi kalpui nise an ti bawk. Medical Dept. leh Horticulture Dept.-a thawktu thenkhat thahnemngaihna avanga ‘Pa huat’ Mamit atanga lak khawm anih avangte leh Mizoram Sorkarin University mithiamte ring tawka thawhpui an duhna avangin Pu John Zothanzama, Asst. Prof. MZU chuan lawmthu a sawi.
Heng bakah MZU leh Minnesota University thawhhona hmathar lakna turin US Aid atanga kalpui turin ‘weather data for climate smart agriculture’ leh ‘improving women’s access to urban market’ tih project buatsaih thar a ni a. America Sorkar suma project hi kalpui tum a ni.
NLUP avanga America University lian ber 3-na te leh MZU mithiamte hmanga Mizoram hmasawnna leh eizawnna kawng hrang hrang atana hmalakna kan nei thei hi thil lawmawm a nih bakah, Zofate America University lian ah Zoram hmasawnna tura hmalakna thar kalzel thei hi Mizoram tan thil lawmawm taka ni.
Chief Minister hmalakna leh NLUP rah kal zel in a hetiang thil ropui a hring hi thil chhuanawm tak a ni.
