4032/2024-2025

Dated Aizawl the 30 January, 2025 : Vawin khan Khawvel Puma Pharte ni “World Leprosy Day” chu “Unite, Act. Eliminate” tih thupui hmangin, Taxation Auditorium MINECO ah hman a ni a. He hun hi Dr. Eric Zomawia, Mission Director, National Health Mission, H&FW Dept. chuan khuallian niin a hmanpui. 

Khuallian Dr. Eric Zomawia, Mission Director chuan thusawiin, Phar natna chu India ram pumpui ah kum 2027-ah um bo vek tuma hmalak mek a nih thu leh chumi atana thawk tu NHM hnuaia National Leprosy Eradication Programme te theihtawp chhuahna chu fakawm a tih thu a sawi a. Tunhma chuan India ramah leh Mizoram ngeiah pawh Phar te chuan  endawng an hlawh nasat zia a tarlang a. Department Record danin Phar natna vei mi 1500 chuang an awm tawh thu sawiin tunhma phei chuan mi engemawzat in an lo thihpui thu  a sawi bawk a. Tunlaiah erawh chuan Phar natna enkawlna damdawi MDT chu man to tak ni mahse a thlawn liau liaua sawrkar in a pek thu a sawi a ni.

Vawiina hun hman hi  Dr. Lalawmpuia Chhangte, State Leprosy Officer, National Leprosy Eradication Programme, NHM chuan kaihhruaiin kal khawm te hnenah phar natna chungchanga Department hmalak dan leh hnathawh dan report e pe a. Tun dinhmunah Phar Natna vei chu: Aizawl District-ah 4, Lunglei District-ah 2, Lawngtlai District-ah 3 leh Kolasib District-ah 1 an awm mek thu sawiin, Phar natna chu tihbaiawm a nih loh thu leh he natna nei a inrinhlelhna neite chuan Damdawiin hrang hranga skin specialist te emaw Civil Hospital Aizawl, Department of Dermatology ah in entir thin turin a ngen bawk a ni.

Dr. Lalnunpari Sailo, MD, Dermatology, MO i/c Urban Leprosy Centre Civil Hospital, Aizawl pawhin Leprosy Natna hmuhchhuah dan leh enkawl zui dan Power Point Presentation a pe a.  The Leprosy Mission, Mizoram, Executive Secretary, Rev. TC. Zodinsanga hnen atangin Kohhran anga hma an lak dante ngaihthlak nghal a ni bawk.

Vawiina hun hmanah hian Health Department Official thahnem tak bakah Mizoram College of Nursing Final Year Student-te leh Health Worker Training Institute, Kulikawna Final Year Zirlai te an tel a ni.