4033/2024-2025
Aizawl, the 30th January, 2025: Vawiin chawhnu dar 3:00 khan Durbar Hall, Raj Bhavan-ah 'Ek Bharat Shreshtha Bharat' hmalakna hnuaiah Mizoram Larsap Gen (Dr) Vijay Kumar Singh, PVSM, AVSM, YSM (Retd) chuan Uttar Pradesh State leh Dadra and Nagar Haveli and Daman and Diu Union Territory-te Foundation Day lawmna hun a buatsaih. Uttar Pradesh foundation day hi January ni 24 niin, Dadra and Nagar Haveli and Daman and Diu foundation day hi January ni 26 a ni a, remchan zawkna avangin vawiin hian lawmsak an ni.
Larsap Gen (Dr) VK Singh, PVSM, AVSM, YSM (Retd) chuan kalkhawmte chu Uttar Pradesh leh Dadra and Nagar Haveli and Daman and Diu-te foundation day puala chibai bukin duhsakna a hlan a. India rama State leh Union Territory hrang hrangte'n chanchin leh hnam ziarang ngaihnawm tak tak an neih thu sawiin, foundation day buatsaih chu hnam zingrang, zai, lam, rimawi leh chanchin pholanna leh inhriatpawhtawnna hun remchang tak a ni, a ti a. Sawrkar laipui hmalakna Ek Bharat Shreshtha Bharat chuan hnam inpumkhatna leh hnam ziarangte inzahtawnna chawinun a tum ber thu sawiin, "He programme hi India ram culture hausakzia lawmna leh inpawh lehzualna tura ruahman a ni" a ti bawk.
Larsap chuan thalaite chu India ram hmasawnna chak taka kalpui mekah tha thawhtu nih tum tur leh ram ropui taka India ram siamtu, hnam ziarang leh nunphungte zira, hriat chian tum turin a fuih a. Prime Minister kaihhruaiin India ram chu kum 2047 ah ram changkang leh intodelh, 'Vikshit Bharat' a hlankai tum a nih thu pawh sawiin, hma hun eng tak nei thalaite chu hemi kawngah hian theihtawp chhuah turin a chah a. Kalkhawmte chu India rama cheng mi hrang hrangte min phuarkhawm tlattu hnam ziarang leh danglamnate chu ngaihlua vawnghim tlat tur leh, ram hmasawn dinhmuna India ram hlankai tum turin a sawm bawk a ni.
He hun hi Pi Lalhruaitluangi, Addl. PS to Governor chuan kaihruaiin program buatsaih chhan a sawifiah a. Dr. Pragati Singh, Asst. Prof., NIT Mizoram hnen atangin Uttar Pradesh State chanchin ngaihthlak niin, Dadra and Nagar Haveli and Daman and Diu chanchin tarlanna video thlirho a ni a. UP atanga lokal NIT Mizorama zirlaite'n lemchan leh hnam lam an entir bakah Govt. Mizo Higher Secondary School zirlaite'n hnam lam mawi tak an entir bawk a ni.
Uttar Pradesh hi tunhma British-in India ram a awp hunlai khan United Provinces tih niin, Agra leh Oudh-te a huam a ni. January ni 24, 1950 ah khan Uttar Pradesh tia thlak a ni a. India rama State mipui tamna ber leh a len zawnga chhiara 4-na a ni. Union Territory pahnih Dadra and Nagar Haveli leh Daman and Diu-te hi Portuguese colony ni thinin, January ni 26, 2020 khan Union Territory pakhata chhunfin an ni a. Sik leh sa nuam leh hmun mawi tak, tuipui kama awm a ni.
Ek Bharat Shreshtha Bharat programme hian India rama State leh UT hrang hranga cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh an inkara inhriatthiam tawnna nasa zawk siam a tum a. Ek Bharat Shreshtha Bharat programme kaltlang hian India rama State leh UT hrang hrangte Foundation Day lawmna chu Raj Bhavan, Mizoramah Governor kaihhruaiin June, 2023 atang khan buatsaih tan a ni.
