4034/2024-2025

Lunglei, 2025 Pawlkut thla ni 30: February ni 12, 2025 (Nilaini)-a Lunglei District chhunga village council (VC) 88 leh Lunglei Municipal Council (LMC) huam chhunga local council (LC) 24-a inthlanpui buatsaih tura inthlan buaipuitu tur Presiding Officer (PRO) leh Assistant PRO-te tan vawiin khan Government High School, Lungleiah training buatsaih a ni.

Master trainer paruk - Pi TT Beikhaizi (SDO Sadar), Pu Lalremruata Sailo (DCSO), Pu Vanlalmuana (Asst Professor, Govt JB College), Pu Lalthanmawia (Asst Prof., LGC), Pu Z. Lalthanliana Langva (Asst Prof., LGC) leh Pu C. Lalrindika (Lecturer, Govt HSS Lunglei) te chuan training hi pein, inthlan buatsaihnaa thil ṭul leh pawimawh hrang hrangte an zirtir a. Ballot paper leh lehkha pawimawh (form) hrang hrang hman dan te a taka zir ho ni bawkin, zawhna leh chhanna leh sawi hona hun hman a ni bawk.

Lunglei District chhunga VC leh LC inthlan buatsaih turah hian vote thlakna tur hmun, polling station 165 (VC-ah 114 leh LC-ah 51) a awm a. He'ng polling station-ahte hian inthlan buaipui turin PRO pakhat leh Polling Officer (PO) pahnih ṭheuh ruat an nih bakah, voter tam zualna polling station 24 (VC 13 leh LC 11)-ah chuan APRO tur ruat tel an ni bawk a. Thlaveng atan reserved polling official eng emaw zat ruat an ni bawk.