Vawiin World Malaria Day denchhenin Champhaiah chuan District Vector Borne Disease Controlled Programme leh Christian Medical Association of India (CMAI) tangkawpin rally leh poster tarin hun an hmang a. Rally neih zawh hian Champhai Kahrawt YMA Hall-ah inkhawm tawi buatsaih a ni a. He hunah hian Dr C. Zirliana, CMO chu khuallian niin Pu John Laldina, SP chu khual zahawm a ni.

World Malaria Day hmanna programme, Dr Lalhmingmawii (DVB Consultant) in a kaihruaiah hian Champhai CMO chuan malaria laka invenhim mai bakah, sikserh natna umbo hna chu mimal tinte mawhphurhna a ni tiin, invenna kawng chi hrang hrangte a tarlang a. Khawsik leh harsatna neite chuan hriselna lama thawkte pan hreh loh thin turin kalkhawmte chu a chah a ni.

Vawiin hunah hian CMAI atangin Pu Lalthazuala`n thu a sawi bawk. Vawiin rally neihah hian Kendriya Vidyalaya School leh tlawmngai pawl hrang hrang bakah Kohhran thalai te thawkchhuakin, DK Traffic Point leh Kahrawt YMA Hall inkarah kawng an zawh a, poster an tar bawk a. Kumin World Malaria Day puala thupui thlan chu "Invest in the future: Defeat Malaria" tih a ni.