Vawiin khan Civil Hospital Lunglei OPD Lounge-ah World Suicide Prevention Day hman a ni a, Lunglei Bawrhsap Pu Abhijit Vijhay Chaudhary khuallian a ni. Hemi puala inkhawm hi Dr. VLMS.Dawngliana, CMO Lungleiin a kaihruai a, khuallian Lunglei Bawrhsap chuan thu sawiin, World Sucide Prevention Day hi WHO chuan kum 2013 khan puangin hemi kum atang hian hman tan a ni a ti a, khawvelah mahni intihhlumna hi a hluar hle a, India ram pawh hi mahni intihhlum tam lamah khawvelah sawmna a ni pha hial a ni a ti. Kumtin khawvel ram hrang hrangah mahni intihlum mi nuai riat vel an awm ziah tih sawiin, hetianga mahni intihhlum a hluar hle lai hian engtinnge kan inven ang tih hi kan ngaihtuah angai a, kan thupui Connect, Communicate, Care in a tum ber chu mihring te hi khawvelah mahni chauha kan awm lo va, hemi avang hian kan thupuiah pawh mihring tupawh hian midang nena inlaichinna tha leh inpawh taka awm theihna a hlu a ni a ti. Hei mai bakah hian midang te kan ngaihsak a, kan inngaihtuah tawn hian kan nuna harsatna nasa takin sutkian a awlsam thin a ni  tiin, a tlangpuiin ruihhlo ngaite hi kan veng, mimal leh chhungkua ten inpawh tawn taka kawmthiam leh enkawl thiam a pawimawh hle a ni a ti.

Vawiina he hun hmannaah hian Angela Zohmingthangi, Social Worker-in kumtina khawvela mahni intihlum an awm dan leh Lunglei Dist bika 2010-2016 chuunga mahni intihlum mi 78 an awm thu tarlangin, heng zinga a tam ber chu kum 15-19 an nih thu a sawi. Civil Hospital Medical supdt. Dr. Lalsanga pawhin thu sawiin, khawvel changkang zelah mihring khawsak dan a danglam zela engemaw avanga rilru chiai theih maina a tam zela hetiang avanga mahni intihhlumna thleng thin veng tur hian sawrkar laipui ruahmanna angin theihtawp kan chhuah ho a tul a ni a ti.