No.1925/2021-2022
Dated Aizawl, the 19th August, 2021 : Vawiin khan Mizo Photographer Society leh I&PR Department buatsaihin I&PR Auditorium ah World Photography Day, 2021 vawi 182 na hman a ni a. He hun hi Pi Lallianpuii, Director, I&PR chuan khuallian niin a hmanpui.

Thuchah sawiin Pi Lallianpuii chuan thlalatute chu picture tha leh ro tling a awm zel theih nan an thiamnate tisang zel turin a sawm a, Mobile a thlalak te pawh tha ve tho mahse, camera tha tak hmanga thlalak nge nge hi siam len leh cheibawl a dawl thin tih hriat a ngai a. Resolution sang tha tak, picture tha tak, Mizoram ram thla leh a chhunga cheng nungcha leh thil thlengte, Sawrkar hmunhma infrastructure leh hmalakna hlimthla te chiang taka min hmuhtir thintu chu thlalak - photographs bawk hi a ni thin, a ti a.

Thlalak hi a hlu hle a, vawiinah chuan kan nitin chanchinbute pawhin hma an sawnin, kan thu chhiarte tifiah tur leh tinghet thurin thlalak tha tak tak hmuhtur a awm ta a, a hlu hle a ni. Picture pakhat hi thumal sangkhat tluk a ni, an lo ti reng a. Thlalak hian power, magic ril tak a nei a ni tih kan hriat fo a ngai a ni, a ti a. Mizo history vawng nung a, Sawrkar hmalakna leh Zoram mawina te mitin hmuha pho chhuak turin thlalak tha kan mamawh zel dawn a ni, a ti a ni.

Vawiin inkhawm hi Pu Zoramchhana, Finance Secretary-in a kaihruai a, he function ah hian MPS in World Photography Day denchhena Photo Competition Facebook kaltlanga August 9th - 15th chhunga an buatsaih lawmman hlanna neih nghal a ni a. Intihsiakna result chu hetiang hi a ni.

1. Open

1st - Vanlalhruaizela, 2nd - Jacob Lalrinawma, 3rd - Zongchinthanga

2. Covid-19 in Mizoram a nghawng dan.

1st - Lalrinchhana, 2nd - Phuto Lalramdinthara, 3rd - V.L Remruata

3. Still Life

1st - Zongchinthanga, 2nd - David Vanlalhuma, 3rd - Lalsiamkima

World Photography day lawmnaah hia  Pu Zakhuma West Phaileng (West Phaileng Photographers Society member ni bawk) chu ramngaw leh nungcha tana a thawh hlawk avang leh Mizoram a sakei awm (Record) tawh lo, a thawhrimna leh inpekna avanga camera trap hmanga a lak avangin Chawimawina, MPS ten an hlan a. Nl.Baryl Vanneihsangi Tlau MPS Lady 2016 (Top-10) chu MPS Lady zinga AMC inthlana Ward XIX atanga thlan tlin anih avangin lawmpuina an hlan bawk a ni.