Reproductive & Child Health (RCH) bultumin vawiin khan Health Department Conference Hall-ah “World Population Day, 2019” hman a ni a. Dr.F.Lallianhlira, Principal Director, H&FW chu Khuallian niin, “World Population Day, 2019” ah hian thupui atan – “Nu leh nau an lo hrisel zawk nan chhungkaw ruahmanna fel tak nei rawh” tih chu hman a ni.a
 
Khuallian Dr. F.Lallianhlira chuan Family Planning kan hmelhriat dan leh kan hmuh dan hi kan thlak a ngai a ni a ti a. Awmze neia chhungkua hi kaihhruai a ngaih thu leh, ruahmanna felfai tak nena mitinin chhungkua enkawl a tul takzet thu a sawi a ni.
 
World Population Day, 2019 hi thla khat chhung hman tur a nih avangin hun hnih ah then a ni a. Thenkhatna “Mobilisation Fortnight” hi June ni 27 atanga July ni 10 thleng khan a awh a. He hun chhung hian ANM leh ASHA ten nupa tuak record-te enfelin fa neih chungchang zirtirna an pe thin a. Mipuite hnenah a remchan dan ang angin kum tlin hnu ngeia nupui pasal inneih a him thu te, nu leh naute mila chhang khat a thatna, inneih atang kum 2 hnu-ah tal naupai a thatna, kum 3 dan zela nau pai, nau neih hnu-a indanna hrang hrang bakah thil pawimawh tak tak te inzirtirna hun atan hman a ni.
A then hnihna July ni 11 leh July ni 24 inkara hman “Population Stabilisation Fortnight”-ah hian OPD/Hospital leh hmun remchang-ah Family Planning method hrang hrang pholan a, hmeichhia ten family planning chungchangah duhthlanna an neih theih nan couselling te;  thuziak, poster leh banner hmanga auhla (slogan) phochhuah te niin khawtinah leaflets te sem a ni dawn bawk a ni.
 
World Population Day pual inkhawm hi Dr H.Lalchungnunga, Director of Health Services-in a kaihruai a. Chairman hian kalkhawmte lawmna thu a sawi hnu-ah Dr.Lily Chhakchhuak, State Programme Officer, RCH hnen atangin Family Planning Status in Mizoram tih thupuia hmangin Powerpoint presentation thlir leh ngaihthlak a ni.