Vawiin khan Pu Lalchamliana Home Minister, Home, Taxation, Disaster Management & Rehabilitation Department chuan Mamit District chhung  Border Out Post (BOP) hrang hrang Zamuang, Kalolian, Zawlpui, Borai, Buangthuam leh Thinghlun BOP te bakah Zawlnuam Police Station, Kanhmun Police Station leh Kawrthah Police Station-te a hmunah a tlawh.

Home Minister chuan Border Out Post a duty-te chu an dinhmun, an harsatna te ataka hmuhpui a duh avanga an hmunhma ngeia tlawh anih thu a sawi a, Ram leh hnam venghim tura thawktu an nih angin ruihtheih thil hrang hrang laka fihlim tum turin a chah a. An awmna khaw mipuite nen in pawh tlang taka khawsa ho tur leh boruak tha tak siam tura hmala theuh turin a chah a ni.

BOP hrang hrang a tlawhna ah hian Zamuang BOP pan chhohna kawng Motor tana luh theihloha harsatna awm chu thawmthat dan ngaihtuah anih dawn thu a sawi a, Kolalian BOP Building hrang hrang chu a theih ang anga thawmthat dan tur kawng zawn a nih dawn thu a sawi bawk. Heng bakah hian BOP hrang hrangte chu an harsatna leh mamawh angte chu a theih ang anga bawhzui sak dan tur ngaituah sak an nih dawn thu sawiin Police Station hrang hrangte pawh an building, thawktu dinhmunte a hmunah hmuhpui bawk a ni.

Home Minister hian Kanhmun khawtlang hruaitute hma-ah thusawiin Mizoram Sawrkar hmalakna tur miharsa leh chhumchhiate khaichhuahna atana duan SEDP-ah Minister hrang hrang Chairman-na hnuaiah Committee peng hrang hrang 14 din a ni a, Budget vaibelchhe 750 lai dah niin chumi hmang chuan  hmala chhoh tura ruahmanna siam a nih thu a sawi bawk.

Home Minister hian BOP tin te'n an hman tur atan hian Volley ball leh Volley ball net a pe bawk a ni. 

Er.H. Lalzirliana, Mamit Bialtu MLA pawhin kan District chu India rama District hnufual chawikan ngai zinga awm kan nih avangin zirna, mipui hriselna  leh kawng dang dangah te hmalakna tur tam tak a awm dawn a, chungah chuan kan zavaia kan thawhtlan a tul dawn thu a sawi bawk.

Home Minister-in BOP hrang hrang a tlawhkualna-ah hian Er.H Lalzirliana, 3-Mamit Bialtu, Lalbiakthanga, Khiangte IPS, DIG (NR), Shashank Jaiswal, IPS SP Mamit, Pu Jacob  Lalawmpuia, Addl DC, Mamit, Pu Lalthakima, Dy. Commandant 4th IR Bn, Er Eddie C. Zothansanga EE, PHQ te bakah khawtlang hruaitute'n an tawiawm a ni.

Attachment

  • Loading attachment...