Nimin (1.10.2018) chawhnu khan Save Chite Lui Coordination Committee (SCLCC) buatsaihin Assembly Annexe Conference Hall-ah Mizorama a vawi khatna atan ‘World Rivers Day 2018’ hman a ni a. Deputy Speaker Pu R. Lalrinawma chu Khuallian a ni a. Thupui chu 'Ka Chite Lui, ka ram rohlu, ka humhalh ang' tih a ni.

Khuallian Pu R. Lalrinawma chuan khawvel hmun dangte angin Mizoramah ‘World Rivers Day’ hman a ni chu lawmawm a tih thu a sawi a. Kum 2005 atang khan September ni hnuhnung berah hman thin a ni a, Mizoramah chuan chawlhni a nih avangin October Ni 1-ah hman a ngai ta a ni, a ti a. Mi thahnemngai tak takin chite lui tihfaina leh chhanchhuahna kawngah an tha an seng nasa chu chhuanawm a tih thu a sawi a. Chite lui pawh lang hlei thei lo hial khawpin bawlhhlawh tam takin a chim nasa hman a, Save Chite Lui Coordination Committee hmalakna leh NSS leh school hrang hrang zirlaite bakah mi tlawmngaite avangin zawi zawiin chite lui pawn hma a sawn leh phah a ni, a ti a. Midang tih tur ringawta dah lovin mitin hian kan mawhphurhna theuhah kan ngaih a tul a ni tiin chite lui chhanchhuahna atana hmalakna The Chite Lui (Prevention and Control of Water Pollution) Act 2018 pawh Mizoram Legislative Assembly-ah pawm a ni tawh a ni, a ti a. Chite Lui humhalh chhoh zel a nih chuan thalaite tan pawh hawi thawvenna hmun nuam tak a ni thei a ni tiin thangtharte pawhin tui leh tuihna pawimawhna te an hriat a pawimawh a, kan harh chho tan hret hret a ni, a ti a. Khaw dangah pawh lui humhalh kawngah hmalakna a awm zel chu lawmawm a tih thu a sawi a. Tuihna siamtu thing leh mau ti chereu lo tura tan lak zel a pawimawh thu a tarlang a. Tun dinhmunah hian chite lui bakah lui dang humhalh kawngah hma kan sawn a, theihtawp kan chhuah chuan kan luite hi kan la chhanchhuak thei a ni tiin kalkhawmte a fuih a. Aizawl khua leh tui kan nihna angin The Chite Lui (Prevention and Control of Water Pollution) Act 2018 bawhchhia a, chite lui tibawlhhlawh tute chu police hnenah kan hrilh tur a ni a, chite lui humhalhna kawnga kan tih theih tam tak zinga pawimawh tak a ni, a ti.

Save Chite Lui hi kum 2017 khan kalpui tan a ni a, Save Chite Lui Coordination Committee chuan June 2017 atangin hma an la tan a. Action Plan Phase-I hi awareness campaign atana hman a ni ber a, Action Plan Phase-II hi department hrang hrang nena thawhhona tura ruahman a ni a, check dam siam te, lung rem te leh a kaihhnawih dang te siam tura ruahman a ni a, awareness campaign a tel zel dawn a. NSS leh zirlaiten thahnemngai takin Chite Lui hi an lo tifai tawh thin a. The Chite Lui (Prevention and Control of Water Pollution) Act 2018 bawhchhiaa Chite Lui tibawlhhlawhtu chu tupawhin eng hunah pawh SDPO, Aizawl North (0389-2340242) hnenah hriattir zel tur a ni. Save Chite Lui Coordination Committee chuan Chite Lui dung veng tu tur a ruai tawh bawk a ni.

AMC Mayor Pu PC Lalhmingthanga'n programme hi kaihruaiin kalkhawmte lawmna thu a sawi a. Chite Lui chhanchhuahna tura hmalakna SCLCC General Secretary Pu Rochamliana atangin ngaihthlak a ni a. Chite Lui hlimthla thlirhona neih a ni a. 'Kan rama lui leh tuihna humhalh a tulzia' tih thupui hmangin thusawi ngaihthlak a ni a, thusawitute chu Synod Higher Secondary School atangin Amanda C. Laldinpuii leh Govt J.L. Higher Secondary School atangin Lalrofeli an ni a. Miss Mizoram 2018 T. Ramthanmawii hovin thuchhamna neih a ni a. SCLCC Jt. Secy Dr. H. Lalruatsanga chuan lawmthu sawina in hun a khar a ni. He hunah hian Save Chite Lui Coordination Committee memberte, Mizoram State Pollution Control Board, Intach, NSS, MJA, school naupangte an tel a ni.