Vawiin chawhma dar 11 khan I&PR Auditorium-ah World Taekwondo Federation (WTF) Black Belt chu mi 30 hnenah Mizoram Amateur Taekwondo Association  (MATA) chuan a hlan a. Sports & Youth Services Minister Pu Zodintluanga chuan khuallian niin he hun hi a hmanpui.

Khuallian, Sports & Youth Services Minister Pu Zodintluanga chuan tunlai thalaiten hlawhtling turin hun tha tak an nei tih sawiin thalaite chu an vanneihnate hmang tangkai turin a chah a. MATA chu Mizoram a sport association hrang hrang zinga discipline tha ber nia a hriat thu sawiin Minister chuan Black Belt pass tharte pawh midangte entawntu mai ni lova midangte entawn tura nun uluk tura chah a. Khuallian chuan hlawhtlinna tura dan zawm that pawimawh zia sawiin infiammi kalkhawmte chu dan zawm gaipawimawh zel turin a fuih bawk.

Vawiina Black Belt hlantharte hi kum 2014 November thlaa Aizawla exam beitute kha an ni a. Mi 30-in pass-in, chung zinga mi 21-ten 1^stDan, mi 7-ten 2^nd Dan leh mi 2-ten 3^rd Dan an tling a ni. Black Belt Certificate chu Khuallian Pu Zodintluanga, Sports & Youth Services Minister, leh MATA hruaitu- President Dr. Rualkhuma Colney, President hlui Dr. Lalbiakmawia Ngente, leh Senior Adviser Pu Rosiama Vanchhong, IFS ten an hlan a. Senior Black Belt chu Pu Moses Lalsangzuala, 3^rd Dan; Pu F. Laltanpuia, 3^rd Dan; Pu Joseph Thansanga, 4^th Dan; leh Pu VL Sawma, 4^th Dan ten belt an hren tir thung a ni.

Belt hlanna inkhawm hi MATA Vice President Pu K. Laldawngliana’n a kaihruaia. MATA President Dr. Rualkhuma Colney chuan Black Belt dawngtute chu duhsakna hlanin, an hlawhtlinna chu Mizoram tan hlawhtlinna a nih thu a sawi a. Taekwondo Belt chi hrang hrangte hlutna leh awmzia a sawifiah bawk. MATA General Secretary Pu Joseph Thansanga chuan Report a pek bakah MATA Mission Team-ten demonstration an entir a. Sawbikten fuihna thu tha tak tak an  sawi a hnuah MATA Senior Adviser Pu C. Lalthanmawia chuan lawmthu sawinain hun a khar a ni.

MATA hnuaiah hian vawiina Belt hlan thar takte nen mi 187 in Black Belt an pass chhuak tawh a, an zingah hian hmeichhia 50 an tel a ni. Black Belt pass hmasa ber chu Pu VL Rawna (L) niin kum 1987 khan a pass a. Mizo zinga Black belt pass thei naupang ber chu Simon Lalrinchhana, R. lalchhandama fapa niin kum 9 a nihin  a pass a ni. Mizoram hi kum 2008 atang khan North East Black belt exam centre pakhat atan ruat a ni a. Aizawla hian Black Belt exam tum li buatsaih a ni tawh bawk.