Vawiin chawhnu dar 2 khan Chief Secretary Conference Hall-ah Chief Secretary Pu Lalmalsawma, IAS kaihhruaiin Mizoram sawrkar leh Japanese International Cooperation Agency (JICA) aiawhte chuan ‘Capacity Enhancement for Sustainable Agriculture and Irrigation Development’ project atan thawhhona thuthlung an ziak a. Mizoram sawrkar aiawhin Commisioner & Secretary to the Government of Mizoram, Minor Irrigation Department leh he {roject-a JICA thawhpui tur Department - Minor irrigation, Agriculture, Horticulture leh Soil & Water Conservation Department hotuten hming an sign a ni.
Thawhhona thuthlung ziah puala inkhawmah hian hian JICA aiawhin Mr. Satoru Fujita, Team Leader and Dy. Director, Rural Development Department, JICA Head Office, Tokyo; Mr. Akihiro Kimura, Representative from JICA India Office, New Delhi; Mr. Shigeki Yamaoka, Consultant; Mr. Katsuyki Yamamoto, Consultant; Mr. Shigeko Sakai, Consultant-te an tel a. Team Leader Pu Satoru Fujita chuan he Project kalphung tlangpui a sawifiah bawk.
He Project hnuaia hmalakna hmasa ber atan RD Block pali - Bilkhawthlir, Aibawk, Serchhip leh Champhai-te atangin khaw pakhat theuh thlan a ni ang a. A thawhhnihnaah chuan block palite atangin khaw 3 emaw khaw 4 emaw theuh thlan leh a ni ang.
JICA hian anmahni senso thoin September, 2013 atanga April 2015 chhung khan Development Study an lo nei tawh a, Mizoramin ei leh bara hma kan sawn theih nan kum 20 chhunga tihhlawhtlin tur 'Master Plan' an duang chhuak a. He Master Plan tha taka kalpui a nih theih nan Technical Cooperation Project (TCP) hmang hian Japan mi thiamten kum 5 chhung Mizoram sawrkar an thawhpui dawn a ni. A senso hi Japan sawrkar tum tur niin kum 5 chhung atan ruahman a ni a, kumin October atanga kum 2021 September thleng kalpui a ni ang. Japan thiamna hlan chhawn a nih theih nan Japan ramah tum 3 training buatsaih a ni ang a, sawrkar hnathawk bakah kut hnathawktu-te training tur hian tirh an ni ang.
He thawhhona enkawl tur hian Mizoram Chief Secretary kaihhruaina hnuaiah Joint Coordinating Committee (JCC) din a ni a. He Committee ah hian Secreatary hrang hrang bakah Ministry of Water Resources aiawh an tel bawk ang.
