Vawiin khan Kolasib DC Pu H. Lalengmawia, IAS hovin BPL thlanna atana din District Level Monitoring Committee on BPL Baseline Survey chu a pisaah an thukhawm a. Pu H. Lalengmawia chuan BPL Baseline Survey hi Indian Statistical Strengthening Programme (ISSP) hnuaia kalpui anih thusawiin tun dinhmunah chuan Department hrang hrangin an mahni pualin BPL list an nei fur a, hemi avang hian harsatna pawh kan tawk fo thin a. Mahse tuna BPL thlanna tur hi chu nakin zelah rin chhoh zel tur a ni a, a thlanna kawngah pawh kan fimkhur tlan a ngai a, a kaihhruaina bu ang thlapa thil tih a pawimawh dawn a ni a ti bawk.

Meeting-ah hian BPL Baseline Survey neih dan tur chungchanga hmalak dan tur sawiho niin a kaihhruaina bu Manual for Baseline Survey 2016 chu Member ten chipchiar leh zau takin an zirchiangin an thlirho a. Tehfung hrang hrang Manual a langte chu ngun takin a mal te tea sawihoin hriatthiam loh lai te chu Research Officer, Economics & Statistics in a hrilhfiah a. He Survey a mawhphurtu BDO Thingdawl leh BDO Bikhawthlir te chu April ni 1 aia tlai lovah hemi chungchangah hian Training ko a, Survey kalpui dan tur hi VC leh NGO aiawhte zirtir tura tih an ni.

Khawtinah hian BPL thlanna atan hian VC leh NGO te telna Committee din tur a ni.

A thawhkhatna atana Baseline Survey hi May ni 20, 2016 ral hma a zawh tur niin chung survey-na lehkha te chu District Monitoring Committee hnenah May 2016 thla ral hmain thleng kim tur a ni ang a. Baseline Survey Report-te chu Director Economics & Statistics hnenah ni June ni 10 2016 aia tlai lova thawn tur a ni a, anni hian July thla ral hmain a bu in an chhuah dawn a ni.

State Level Monitoring Committee for BPL Baseline Survey hi February ni 2 khan Aizawl a thukhawmin a kalpui dan tur a lo rel tawh a ni.