Nimin khan Kumtluang Hall, CMO Office Mamit ah World TB Day hman a ni a, Pu Jacob Lallawmpuia Addl DC, chuan khuallian niin a hmanpuia, 0 Dr P.C Lalliannghaka District Medical Superintendent (DMS) chu khualzahawm a ni bawk.
Pu Jacob Lalawmpuia Addl DC, chuan India ramin khawvela pakhatna dinhmun kan hauhna chu TB vei tam lam ah a ni chu thil duhawm lo tak a ni a ti, World TB day ah hian TB dona thinlung kan put thar a pawimawh hle a, chu chu kan hman chhan ber ni se a duh thu a sawi, Kum 2025 ah chuan khawvel hi TB awmlohna hmuna siam tum a ni a, chu khawvel siam tur chuan nang leh kei hi kan pawimawh a ni a ti. Health Department a thawktute chu TB mai nilo natna hrang hrang do na kawngah theihtawp chhuaha hmala chho zel turin a sawm a ni.
Pu Jacob-a chuan Midang nunna chung thu a hnathawktu ti hial a sawi theih Health Department-a thawktute a bikin Doctor te chu an pawimawhna, an hlutna leh an ropuina hre thar a, kan ram kan society tana an tangkaina chu an in hriat thar deuh deuh a duh thu sawiin kan hnathawh chuan kan District leh kan ramah danglamna siam ngei se a duh thu a sawi bawk a ni.
Dr PC Lalliannghaka, DMS chuan TB chu kan pi leh pute atanga ngawr ti a kan lo hmelhriat thin kha a ni a, natna tihbaiawm taka ngaih leh tih a ni thin, tunlai changkanna in min tuam tawh hnu fe ah pawh he natna hian min la kiansan loh avangin India ram pumah kan Prime inister zahawm tak chuan a ngaipawimawh hle a, hmalakna tur tam tak duan chhoh mek a ni a ti. A nihna tur ang tak leh a hun taka enkawl chuan natna tihdam theih a nih thu a sawi.
Pu A. Vansangliana STS chuan Mamit District TB vei te dinhmun tlangpui a tarlan atanga lan danin kum 2003 - 2018 chhungin khak exam mi 5579 an awm tawh a, TB vei enkawl hi mi 1030 an awm a ni. Mi 16 te chuan nunna chanin mi 921 te enkawl dam an ni tawh a, damdawi ei mek mi 37 an awm bawk a ni.
World TB Day pual hun hman hi Dr Zothankhuma, Chief Medical Officer (CMO) Mamit chuan kaihruaiin World TB Day hi a ni tak 24. March, 2018 chu remchan zawkna avangin nimin zirtawpni khan hman a nih thu a sawi, Dr C. Malsawmkima MD (Med)RNTCP chuan TB in kan taksa a bu a khuar theihdan leh he natna hrik chungchanga hriattur hrang hrangte a tarlang bawk a ni. Pu Hmingchungnunga, DPS leh TB damdawi tha taka eia dampui ta leh damdawi petu te atangin thusawi ngaihthlak a ni bawk a. Dr T.C Hmingthangin lawmthu sawiin hun a khar a ni.
