Vawiin khan khawvel hmun hrang hrang rualin World TB Day Tourist Lodge, Chaltlangah Mizoram State Health Society (TB Control) buatsaih in hman a ni a, “Mamawh: TB awmlohna khawvel atan hmahruaitu” tih thupuiah hman a ni a, Health Minister Pu Lal Thanzara chuan Khuallian niin he hun hi a hmanpui.

Health Minister Pu Lal Thanzara chuan India hi TB vei tamna ber ram kan ni a, World TB Day thupui ang hian kan thawhna theuhah, Sawrkar leh NGO hrang hrangte bakah mimal angte pawha TB natna um bo tur hian kan tanrual a, hruaitu anga hma kan lak theuh a tul takzet a ni, a ti a. Mizoram sawrkarin TB dona kawnga hma an lakna hrang hrangte tarlangin, 2017 chhunga TB zawnchhuah beihpui an thlakna a mi singkhat chuang an endik zingah mi 15 te chu TB vei anni tih hmuhchhuah a nih thu a sawi a, sawrkar damdawiin atangin mi 1931 leh Private damdawiin ah mi 44 vei an hmuhchhuah thu a sawi bawk. Pu Lal Thanzara chuan TB vei dapchhuahna kawngah Central TB Division atangin Medical Mobile Van Mizoram sawrkarin an dawn thu a tarlang a, awlsam zawka TB hrik hmuh chhuah zung zung theihna tur Catridge Based Nucleic Acid Amplification Test (CBNAAT) pasarih lai Civil Hospital Aizawlah leh Medical Mobile Van ah te hmantheih in a awm tawh thu a sawi bawk. Single Window Delivery System hmangin TB-HIV Co-infected patient te tan ART centre atangin TB leh ART damdawi lak kawp theih anih tawh thu a sawi a, TB vei zawng zawngte tanpuina chu Direct Benefit Transfer hmangin an bank account ah thunsak maitheih tura ruahman anih thu a sawi bawk. Pu Lal Thanzara chuan, Private doctor, Laboratory leh Private Hospital a TB hmuhchhuah leh enkawl te hi, danin a phut angina sawrkarah report vek tur a ni, a ti a, he natna inkaidarh theih, tih dam theih ni si, ngaihthah a hlauhawm tak TB hi a lo tawp theih nan kan zavaiin hmahruaitu nih I tum theuh ang u, a ti. He hunah hian Health Minister Pu Lal Thanzara chuan CBNAAT site, Civil Hospital Aizawl, hawnna hun a hmang nghal bawk.

Dr. Lalrozama, IAS, Mission Director, NHM chuan kalkhawmte lawmna thu sawiin, thawh hona tha tello chuan TB natna hi do hneh a harsat thu a sawi a, sawrkar department hrang hrangte bakah MHIP, MUP, MZP leh NGO hrang hrangte tanrualpui turin a ngen a. Dr. Vanlalfela, State TB Officer hnen atangin TB dona kawnga kum 2013-2017 chhunga an hmalaknate ngaihthlak niin zaithiam tak tak te zai ngaihthlak a ni bawk.