2038/2023-2024

Aizawl, the 27th September, 2023: Tourism Department buatsaihin vawiin chawhnu dar 2:00 khan RB McCabe Hall, Aijal Club-ah World Tourism Day puala hun hman a ni a, he hunah hian Pu TC Pachhunga, Vice Chairman, Tourism Development Board chu khuallian a ni.

Khuallian Tourism Development Board Vice Chairman Pu TC Pachhunga chuan khawvel pumpuia World Tourism Day pual hun hman ruala Mizorama hun hman a ni chu lawmawm a tih thu sawiin, India rama a lawmna pui ber New Delhi-a hun hmanah Reiek khuain Best Tourism Village of India 2023 a dawng chu chhuanawm a tih thu a sawi a, hei hian tourism chawisang kawngah a taka ke pen zel a nih zia a tarlang a ni a ti a. Mizoram Responsible Tourism Policy chuan tourism chawisan kawngah hmasawnna a thlen thu sawiin, Tourism-in Mizorama rahbi thar a kai theih nana dan leh inkaihhruaina hrang hrang duante a tarlang a. Kalkhawmte chu khawvel hriata kan ram mawina leh nawmna te, hnam ziarang leh nunphungte phochhuaktu nih tum theuh turin a chah bawk.

Pu TC Pachhunga chuan Tourist Guide 89 te tha taka zirtirna peka chher chhuah an nih thu a sawi a. Tourism chu hmasawnna ban pawimawh tak khawtlang leh state tana chhawrnahawm tak a ni, a ti a. Sik leh sa humhalh, tui leh boruak thianghlim siam leh a chhunga nungcha leh thing leh mau hrang hrang nena inkawprem taka lendun chu kumin thupui thlan a nih thu a sawi a. Hmalakna hrang hrang hnuaia tithate chawimawi leh puih chu Tourism Department tum a nih thu sawiin, tun hnuaiah hmasawnna ruhrel pawimawh tak takte siam belh a nih thu a sawi a. Travel Agent leh Tour Operator engemawzah neih a nih thu pawh sawiin, awmze nei zawka khualhip, dawnsawn leh sum leh pai dehchhuah kawnga ngaihtuahna sen a nih thu a sawi a. Tourism chu a tha leh dik zawnga kalpui chuan sum leh pai dinhmun siam that theihna, mirethei thlenga thlengpha leh eizawnna ngelnghet siam theitu a ni, a ti a. Zirna in hrang hrang ah Yuva Club din a nih thu a sawi bawk.

He hunah hian Tourism Secretary Dr. Lalrozama, IAS chuan Mission LiFE, Sawrkar laipui Ministry of Tourism leh United Nations World Tourism Organisation & United Nations Environment Program tangkawp hnuaia kalpui tur 'Travel for LiFE (Lifestyle for Environment) Program' chu Mizoram tan a hawng a. Mipuite chu khualzin hawihawm leh dan leh dun zawm mi, mawhphurhnate tha taka hlentu leh midang, nungcha, ramngaw bakah khuarel mawinate zahthiam mi nih tum turin a fuih a. Nakin zela chhuan lo la awm turte tana zoram mawi leh chenna tlak siam tura theihtawp chhuahpuiah a sawm nghal bawk.

He hun hi Pu Saitluanga, Director, Tourism Department chuan kaihruaiin kalkhawmte lawmna thu a sawi a. Pi Rachel Lalrinhlui, Deputy Director, Tourism Department kaihruaiin Responsible Travel Pledge sawi rual a ni a. World Tourism Day thupui 'Tourism & Green Investments' sawizauna Dr. R. Lalrinchhani, Deputy Director, Tourism Department-in a nei a. C.Ramsangzuali, Tourist Officer kaihhruaiin Travel for LiFE thutiam lak a ni a. Pi Lalthakimi Pachuau, Joint Director, Tourism Department-in lawmthu sawiin hun hman a khar a ni.

He hunah hian Pi Zonunthari, Deputy Secretary, Tourism Department chuan Tourism Excellence Award 2023 leh Swachhata Pakwada result a puang a. Lawmman dawngtute chu:
1) Best Hotel:

Pakhatna: Hotel Regency
Pahnihna: Hotel Royale Lalawi
Pathumna: LBL Lodge, Hotel Chhungte International, Hotel Esquire

2) Best Homestay:
Pakhatna: Home Away Homestay
Pahnihna: The 1988 Homestay
Pathumna: Zobawm Homestay

3) Best Tour Operator:
Pakhatna: CMS Holidays
Pahnihna: City Tours
Pathumna: Zoram Tours, Flying Christabel

4) Best Travel Agent:
Pakhatna: D&L Travels
Pahnihna: Mango Tours & Travels
Pathumna: CMR Travels, MDC Tours & Travels

5) Best Restaurant:
Pakhatna: Food Wise Asia
Pahnihna: La Ruby Restuarant
Pathumna: Chopstyx Restaurant

6) Best Stand Alone Catering Unit:
Pakhatna: RT Catering
Pahnihna: Chhangte Catering, Samuel Catering
Pathumna: Hmingliani Catering, Lungmuan Catering

7) Best Tour Guide:
Pakhatna: C.Lalrinhlua
Pahnihna: Lalhruaitluangi
Pathumna: Robert Zotinkhuma Ralte

8) Best Photographer (Tourist Destination):
Pakhatna: Tlauliana
Pahnihna: David Laltlanhlua
Pathumna: Johny Ngurthansanga

9) Best Photographer (Nature & Wildlife):
Pakhatna: Ramthansiama Chawngthu
Pahnihna: C.Lalbiakzama
Pathumna: Zakhuma Don

10) Best Youtuber/Travel Blogger/Vlogger/ Travel Influencer:
Pakhatna: Mizo Compass
Pahnihna: Muana Khiangte, Love of Adventure
Pathumna: Lushai Rider

11) Best Tourism Promoter:
Pakhatna: Zira PC
Pahnihna: Time to Ketchup
Pathumna: Elzet Varte

12) Best Yuva Tourism Club:
Pakhatna: Govt. Zemabawk Higher Secondary School
Pahnihna: Govt. Zakhuma Higher Secondary School, Dept. of Tourism & Hospitality, Mizoram University
Pathumna: Govt. Central Higher Secondary School

13) Swachhata Pakwada titha zualte chu:
Pakhatna: ICFAI University
Pahnihna: Govt. Central Higher Secondary School
Pathumna: Govt. Primary School-I, Chhinga Veng

World Tourism Day hi khawvel pumah United Nations World Tourism Organisation (UNWTO) ruahmannain thupui thlan bik neiin kum 1980 atang khan hman tan a ni a. Kumin hi a tum 43 na niin, kumin atana thupui chu 'Tourism & Green Investments' tih a ni.