Vawiin chawhma dar 9:30 Am khan khawvel hmun dangte rualin Siaha-ah pawh Indian Veterinary Association, Mizoram State Vety Council leh A.H & Vety Department te bultumin State Veterinary Hospital, Siaha-ah World Veterinary Day hman a ni.

Vawiin World Veterinary Day hmanna programme kaihruaitu Dr R. Zapaw Azyu, Veterinary Officer chuan mipui kalkhawmte hnenah thu sawiin, World Veterinary Day hi kum 2000AD a tang khan hman tan niin, OIE (Office Internationale Desepizootics) leh World Veterinary Association te tangkawp chuan ran vulh tute tana tangkai tur Thupui (Theme) thlangchhuakin kum tin April chawhnu lam inrinni hnuhnung berah hman thin a ni, a ti a. He Ni hi khawvel changkang zawkte chuan an hlutin, he ni denchhen hian programme liantham tak tak te siamin Ran vulh tui mite leh ran ngainatute chuan hlim leh hlawkpui thamin hun an hmang thin a ni tiin, keini lam erawh chuan he Ni hi kan la hmelhriat chia loh nih te hian a lang a, tun atang chuan kan rilru puthmangte thlakin ran hmangaihna leh lainatna thinlung tak tak kan put a hun tawh hle a ni, a ti. Kan ran vulh te hi hralh emaw eih tur a tan chauhin kan vulh tlangpui a, he ngaituahna thinlung hi i thlak tawh ang u tiin vawiin Ui vulhtu kalkhawmte chu a chah hlawm a ni.

World Veterinary Day hman chhan leh World Veterinary Day-2019 theme- Value of Vaccination sawifiahna leh Ran vaccination pek pawimawhna mipui kalkhawmte hnenah a sawi hnuah, vawiin World Veterinary Day denchhen hian Siaha khawpui a Ui vulhtute tan Free Anti-Rabies Vaccination (Ui â hri danna) Ui sawmsarih leh pakhat hnenah pek nghal a ni.“

Attachment

  • Loading attachment...