4959/2025-2026

Dated Aizawl, the 23^rd March 2026: Vawiin khan Public Health Engineering Department leh Central YMA te huaihawtin, khawvel puma tui pawimawhna inzirtirna ni  ‘World Water Day’ chu Dawrpui Multipurpose Hall, Aizawl-ah hman a ni a. PHE Chief Engineer (Headquarters) K. Zohmingliana’n kaihruaiin, PHE department-a thawkte bakah tui hna humhalh kawnga an thawhpui department hrang hrang leh CYMA, MHIP, MSCW leh YMA branch hrang hrang hruaitute an tel bawk.

Vawiin hun hmannaah hian PHE Chief Engineer (Zone-I) Er. Ngentluanga’n kumin World Water Day thupui, ‘Water and Gender’ tih hmangin thu a sawi a, tui hnianghnar taka a luanna hmunah chuan intluktlanna a awm thin thu sawiin, tunlai khawvelah mipa leh hmeichhiate intluktlanna thlentu hnar pawimawh tak a nih dan hrang hrangte a sawi bawk. Chief Engineer (Zone-II) Er. Lalropuia pawhin thu sawiin, “Mizoramin fur laiin ruahtui hnianghnar takin (2 - 2.5m) hmu thin mah ila, thalah erawh tui kang avangin kan buai leh fo thin” a ti a, tui renchem nachang leh tui dah khawl nachang hre thar leh theuh turin mipuite a chah bawk.

Central YMA President Pu R. Lalngheta pawhin Mizorama kan lui tui leh tuihnate humhalh a pawimawh takzet thu sawiin “ruihhlo do tluk zetin ngai pawimawh ila, tui hna ti bawrhbangtute chu tu pawh ni se, i do ngam ang u” a ti bawk.

MHIP General Secretary (Hqrs) Prof. Irene Lalruatkimi chuan tui chungchanga hmeichhiate dinhmun UN report tarlangin, khawvel ram puma tui enkawlna Water Policy leh Plan siamah 71% chu hmeichhiate ban phaka siam a nih tawh thu a sawi a, chutihlai chuan khawvel puma hmeichhia 5% te chauh hi policy duangtute zingah an la tel thu sawiin kum tinin tui thianghlim lo leh tui harsatna avangin naupang 1000 chuang an boral thin thu a sawi bawk a; khawvel ram puma 14% ramte chuan tui enkawlna kawngah hmeichhiate chanvo pek leh dah pawimawihna an la neih loh thu a sawi bawk. 

Vawiina World Water Day hmannaah hian, lui tui leh tui hnate humhalh tura thutiam chham rual niin, tui hna humhalh kawnga inelna hrang hranga ti thate hnenah lawmman sem a ni bawk. PHE SE leh CYMA Coordination Committee Secretary ni bawk Er. Lalrinzuala Ralte chuan khaikhawmna thu sawiin hun hi a khar a ni.

United Nations (UN) General Assembly 1992 chuan March ni 22 hi tui pawimawhna inzirtirna ni – World Water Day (WWD) atan a puang a. Kum 1993 atang khan khawvel hmun hrang hrangah hman tan niin Mizoramah chuan kum 2012 atang khan hman tan a ni a, remchan zawkna avangin kumin WWD chu Mizoramah chuan vawiin March ni 23 hian hman a ni. Hemi ni pual hian inelna hrang hrangte buatsaih thin niin, thutiam (pledge) chham rualnate neih thin a ni bawk. UN hian kum tin thupui thlan bik a nei thin a, kumin thupui chu ‘Water and Gender’ tih niin, au hla (campaign slogan) chu - Tui hnianghnarna hmunah intluktlanna a awm thin (Where Water Flows, Equality Flows) tih a ni.

March ni 8 - 22, 2026 chhung khan tui pawimawhna leh tui hna humhalh tura inzirtirna, Jal Mahotsav (Tui Kut) chu State level (Rajya Jal Utsav/Nadi Utsav) leh Village level (Lok Jal Utsav) ah te hman a lo ni tawh bawk.

Lui leh tuihna humhalh kawnga intihsiakna Category hrang hrang leh lawmman latute:

1. Outstanding contribution under the category “Demonstrating continuous 24 x 7 rural water supply excellence”.

Dawngtu - Pu Zohmingsiama, Chairman VWSC, Sailam, Aizawl District 

2. Outstanding contribution under the category “Excellence in Financial Sustainability through Efficient User Charge Collection”

Dawngtu - Pu Laldinthara, Zokhawthar, Champhai District 

3. Outstanding contribution under the category “Women Demonstrating Excellence in FTK-Based Water Quality Monitoring”

Dawngtu - Pi Lalnunpuii, Buangpui, Serchhip District 

4. Outstanding contribution under the category “Distinguished Sarpanch for Outstanding Leadership in Rural Piped Water Supply Management”

Dawngtu - Pu Zoramchhana, Khualen, Khawzawl District 

5. Outstanding contribution under the category “SHG Representative for Exceptional Contribution to Rural Piped Water Supply Management”

Dawngtu - Pi Lalsaichheuvi, Lallen, Mamit District

6. Outstanding contribution under the category “Outstanding Nal Jal Mitra/Rural Water Supply Operator”

Dawngtu - Pu K. Chondro, Belthei, Lunglei District 

Category tina pakhatna theuhte hi Certificate leh Cash incentive hlan an ni.