1971 a Iran rama khawpui pakhat Ramsar -a khawvel ram hrang hrang palai ten intawhkhawmna (convention) an neih tumin khawmuala dil, tuikhuah leh lui tui thianghlim te humhalh turin thuthlung an siam a. He ni hriatreng nan February ni 2 hi khawvel pumpuiah “World Wetlands Day”-ah puan a ni.

Khawvela tui awm te hi tuia cheng chi nungcha chi hrang hrang te chenna leh inhnangfakna, thil to chi tinrengte intunnunna anih bakah mihring te tan pawh damkhawchhuahna atan a pawimawh em em a . Mi thiamten an sawi danin kan chenna lei hmun zaa thena hmun sawmsarih pakhat (71%) hi tuiin a khuh a; amaherawhchu tuifinriat leh tuipui tui al (saline water) chu mihringte ei leh in tlak anih loh avangin chung tui zinga 3% emaw chauh chu mihring te tana ei leh in tlak a nih avangin a humhalh kawngah tan lak a tul hle a ni.

Heng khawmuala tui awm te hi a bul hnaivaia cheng mihring te nen hmasang atanga fel leh tha taka lo inkungkaih tawh thin an ni a, mipui khawsak relbawl (economic activity) kawngah pawh tui tel lo chuan engmah a tih theih tak tak loh a ni. Chuvangin, tui hi a langah pawh lang lo ah pawh a tangkai hle.

Khawmuala tui awm te hi tui thianghlim petu anih bakah lei hnuaia tuihna siamtu a ni a, chung tuihna te chu thilnung hrang hrang te khuanu ruat anga inbuktawk (ecological balance) in a awmtir thei chauh a ni. Ruahsur tam avanga tui luang liam tur tam tak hi dil leh tuikhuah te hian a dawng khawl a, chu chuan tuilian tur a tihziaawm thin avangin leilung luanral tur nasa takin a veng bawk. Khawmuala tui awmna bul vela thing leh mau, thil to tinreng te hian leimin tur a veng nasa hle. Tuifinriat tuifawnin leilung a eihek tur a veng a, thlipui tha chakna nasa takin a tiziaawm thin a ni. Khawmuala tui awm hi a bul vela cheng mihring te hnamzia nen thuk takin a inkungkaih tlat thin. Tui bawlhhlawh lo dawng khawlin a tihthianghlimna tura sawngbawlnaah a  tangkai hle. Khaw lum leh vawh dan a tiziaawmin, a awmna bul vel sik leh sa chungchangah nasa takin kawngro a su a ni. Ramsa tuia cheng chi te, tui leh khawmuala cheng chi te tan an chenna siamsaktu a ni a, ecosystem derthawng leh tihchhiat awl tak vawng nungtu tha tak a ni. Mipui vantlang khawsak relbawl nana thil pawimawh hrang hrang - tui in tur te, sangha khawina atan te, tuahthing lakna atan te, nungcha humhalh nan te, zin veivah nan te, inchawhharh leh intihhlim nan te leh khualzin mite hipna atan pawh a tangkai em em a ni.