Nimin khan ni thum (November Ni 28-30) awh tur XXXIII Annual Convention & National Symposium 2018 chu College of Veterinary Sciences & Animal Husbandry (CVSc & AH), Central Agricultural University (CAU), Selesih-ah neih a ni a. Thupui atan ‘Veterinary Anatomy from Novices to Experts: Supporting Development of Professional Skill in Doubling Farmers Income’ tih a ni a. XXXIII Annual Convention & National Symposium 2018 hawnna hunah hian Orissa University of Agriculture & Technology Vice Chancellor Prof. Surendranath Pasupalak chu khuallian niin MIMER Director Prof. L. Fimate chu khualzahawm a ni a. Indian Association of Veterinary Anatomists (IAVA) huaihawt a ni.

Khuallian Prof. Surendranath Pasupalak chuan thu sawiin thiamna leh finna inhrilhhriatna hun tha symposium neih a ni chu lawmawm a tih thu a sawi a. Kalkhawmte hnenah chuan kan thiamnate hi ram hmasawn nan i hmang ang u, a ti a ni. Khualzahawm Prof. L. Fimate chuan thu sawiin CVSc & AH, CAU, Selesih ten India ram pum huap symposium an thleng chu lawmawm tiin MIMER nena thawhhona tha tak an neih zel a beisei thu a sawi a ni.

Hawnna hun hi CAU Vice Chancellor Prof. M. Premjit Singh chuan a kaihruai a. CVSc & AH Dean Dr. Lalnuntluangi Hmar chuan kalkhawmte lawmna thu a sawi a. IAVA General Secretary Dr. U.K. Mishra, IAVA Vice President Dr. Ishwar Singh, Organizing Secretary Dr. Pranab Chandra Kalita ten thusawina hun an nei a. Dr. Y.L. Vyas chu Lifetime Acheivement Award pek niin Prof R.V.Prasad hnenah Dr. V.R. Bhambuskar IAVA Silver Jubilee Award leh Gold Plated Silver Medal for Veterinary Anatomists of the Year-2018 pek a ni. Dr. Gudepu Purushotham hnenah Fellow IAVA Award hlan niin Dr K.M.Lucy hnenah Fellow IAVA Award leh IAVA Best Research Paper Award hlan a ni. IAVA Convention & Symposium-ah hian Veterinary mithiamte, scientists leh post graduate zirlai 200 vel India ram hmun hrang hrang atangin an lo kal khawm a ni.