1243/2023-2024

Aizawl, 24.07.2023: Deputy Chief Minister Pu Tawnluia chuan vawiin khan Vanapa Hall-a Sports & Youth Services Department leh MZP tangkawpin thalaite tan a Youth-20 Meet on Nationalism, Patriotism & Development an buatsaih chu khuallian niin a hmanpui. He hunah hian SYS Minister Pu Robert Romawia Royte chu khualzahawm a ni.

Khuallian chuan Mizorama Y-20 puala thupui atana thlan “Nationalism, Patriotism & Development” chu tha a tih thu leh thangtharte tan pawha pawimawh tak nia a hriat thu sawiin, khawvel hmathlir leh development kawng hrang hranga nationalism leh patriotism pawimawh thu a sawi. Thalaite’n hma an sawn a, kawng hrang hrangah an mamawh anga dawm kang a, an tan kawng zau zawk hawn sak chu Mizoram sawrkar in a ngaihpawimawh thu leh chumi atana hmalakna hrang hrang siam a nih thu Dy. Chief Minister chuan a sawi a. He Y-20 meet pawh hian thalaite tan hlawkna a thlen ngei a beisei thu a sawi. Pu Tawnluia chuan state dang leh ram dangah darhsarh taka rorelna hrang hrang hnuaia zohnahthlakte an awm loh a, rorelna khat hnuaiah awm an duh avanga hnam movement chu lo chhuak ta a nih thu a sawi a. Chu hnam thinlung avanga hnam pasaltha, ram tana nunna hlu tak tak hlantu martar te pawh kan la hre reng a ni tiin, thangtharte pawhin ram an hmangaihna chu hre reng se a duh thu a sawi. Dy. CM chuan Mizoram remna thuthlung chu India sawrkarin remna thuthlung a ziahpui tawhte zinga la hlawhtling leh changtlung berte zing a mi a nih thu a sawi a. Chu remna thuthlung kal zelah chuan India Danpui a Mizoram humhimna Article 371G chu Mizoram a humhim dan te, Mizoramah chuan ram neitu leh a thehthangna chungchangah state pawn mi an inrawlh theihloh dan te tel a, vawiin thlenga humhim kan nih tak thu a sawi a. Thangtharte rilru ah he hnam thinlung hi kan ram innghahna a ni tih an hriat zel a, hmasawnna atan a pawimawh thu an hriat zui zel a duh thu a sawi. Dy. Chief Minister chuan Mizo hnam tungding tur te, hnam humhim tur a rilru siam laiin ringtu kan nihna hi ka hriat reng loh chuan kal sual a hlauhawm a ni tiin Pathian tih leh rawn chunga ngaihtuahna hman a tul thu a sawi tel bawk.

Khualzahawm Sports & Youth Services Minister pawhin nationalism leh patriotism chu ram leh hnam in hma a sawn a, a lo changtlun theihna tura thil pawimawh tak a nih thu a sawi a. History en let pawhin hnam a chiang, hnam anga inphuarkhawm tlat te chu an ding nghet nge nge thin a ni a ti a. India history ah pawh British awpna atanga zalenna an neih theih nana nationalism leh patriotism pawimawh zia a lan thu a sawi a. Mizo history ah pawh hnam chhan tura nationalism movement kha lo awm ta lo se chuan hnam chimral, a aia lian zawk te’n an pumbilh chan a chan theih thu a sawi. Minister Pu Robert Romawia Royte chuan nationalism rilru atanga lo chhuak zel, a nghawng lian leh pawimawh tak Article 371 G chuan vawiin ni thlenga Mizoram tan a pawimawh zia kan la hmuh zel thu a sawi bawk a. Ram leilung hrang leh lei chungchangah te, culture humin leh kawng dang engkimah min hum dan te sawiin, hetianga India sawrkarin state inrelbawlna atana state sawrkar hnenah thuneihna sang lutuk a pe hi a mak in, a lawmawm hle a ni a ti a.  A hunlaia hma lo la hamsa tute chu an fakawm thu a sawi. Minister chuan Y-20 chungchang sawiin, sarkar laipuia Ministry of Youth Affairs & Sports hnuaia Y-20 secreteriat bultum a ram puma thalaite puala senso programme buatsaih tur a tih ah Mizoramah chuan Nationalism, Patriotism & Development tih thupui hmanga Y-20 Meet buatsaih a nih tak thu a sawi.

Vawiin programme hi MZP President Pu Lalnunmawia Pautu chuan a kaihruai a. Pu L. Ramdinliana Renthlei, Advisor, MZP chuan keynote address a pe bawk. India ramin G20 presidency kumin chhunga a chelh mekah hian economy leh kawng hrang hranga hmasawnna hnaah G-20 ram hrang hrang thalaite chu ram leh khawvel nghahfak an nih avangin an pawimawhna an hriat theih nan leh, kawng hrang hranga ram hmasawnna atan hnuk hnai tura Y-20 buatsaih a ni a. July ni 14, 2023 khan Chief Minister Pu Zoramthanga chuan Mizoram puma kalpui turin a khuhhawnna a lo nei tawh a ni.

Vawiin programme-ah hian resource person pathum atangin presentation ngaihthlak a ni a. Dr. Catherine Lalmuanawmi hnen atangin Cancer laka inhumhim leh enkawl dan ngaihthlak a ni a. Social Welfare & Tribal Affairs Department atangin Pi Lalfakawmi hnen atangin presentation ngaihthlak ni bawkin, ATI faculty Pi Golda Dell Zohmangai chuan Personal Empowerment chungchang a sawi bawk a ni. Inkhawm hi SYS Jt. Secretary Pu David L. Pachuau chuan lawmthu sawiin hun a khar a ni.