YMA General Conference Vawi 67-na Kawrtethawvenga hman mekah chuan nizan khan Mizoram Chief Minister Pu Lal Thanhawla’n Khuallian chan changin khawmpui palaite hmaah thu a sawi.

Thusawiin khuallian Chief Minister chuan Mizoten YMA kan lo nei hi chu Mizo mizia nen a inhmehin hnam dangte pawhin an ngaihlu hle a ni a ti a, hnam tlem zawk mizote tan in lungrualna tha tak min petu a nih avangin a zahawmin a pawimawh em em a ni a ti bawk. YMA ten ram leh hnam humhalh thupuia kan nei hi a ropuia, ram leh hnam humhalh tur chuan keimahni kan in humhalh hmasa tur a ni a ti a, in humhalh tur tam tak, Zonunmawi, Tuihna leh Ramngaw leh a chhunga cheng nungchate kan humhalhna kawngah nasa taka tan kan lak a tul a ni tiin chung ang ti thei tur chuan keimahni pawh ruihthei thil, zuk leh hmuam lakah kan fihlim a tul a ni a ti. Khuallian chuan ram leh hnam humhalhna kawngah YMA nen kan rilru a inmilin kan thawh hona a tha hle a ni tiin sawrkar anga hmalak theihlohna ang chi ah te YMA in nasa takin hma a la thin a a ropui tak zet a ni a ti. YMA ropui zia tarlangin kristian kohhran hrang hrangte min hrutrualtu, milian, mite, hausa leh rethei sawi lova ang khata min entu thalai mai nilo mizo mipui min thlung khawmtu tha tak a ni a ti bawk.

Khuallian chuan thalai kalkhawmte chu hnam dangin kut hnathawhah min run mek a ni tiin kan thawh theih thilah taima tak leh rinawm taka thawk turin a sawm a,zirna chungchangah pawh lehkha zir ngawr ngawr nilovin a thiam a thiam tura kan inzirtir a ngai a, chumi atan chuan Skill Development Mission pawh sawrkarin a din tawh a ni a ti bawk. Khuallian chuan zohnahthlak Mizoram mai nilo, ram pawna mite pawhin mizoram hi Inpui berah an neihthu sawiin hemi kawngah hian rilru zau tak kan put a tul a ni a ti a, zoram chhunga zofate inpumkhatna tichhe tute chu huaisen takin kan do tur a ni tiin, chu chu ram leh hnam humhalhna dik tak a ni a ti bawk. Ramri chungchang pawh haw haw a lak tur a ni lova, a ngaituah tur in an ngaituah ang tiin hemi kawgah hian kan tangtlang tur a ni a ti bawk. Khuallian chuan Mizoram ang ram nuam, sik leh sa tha a awm loh thu sawiin infra-structure lam kawng tha, power te tunah la nei tha tawk lo mah ila, kan hma lam hi a eng a ni tiin kan ramah oil leh gas tam tak a awm tih hriat a ni a, Mizoram University in Petroleum Technology lamah training course buatsaih dawn tawh a ni tiin hei hi thalaiten hman tangkai kan tum tur a ni tiin thalaite a fuih bawk.

He Conference ni hnihna zanah hian Ramngaw humhalh tha YMA Group leh Branch te leh YMA chanchinbu la tha Branch te puan niin lawmman (citation) te hi khuallian in a sem a ni.

Khuallian Pu Lal Thanhawla hi a nupui Pi Lal Riliani, Pu P.C Zoramsangliana Minister, Art & Culture etc, Pu Lalrinmawia Ralte Parliamentary Secretary, Bialtu MLA leh Pu V. Lalremthanga D.C Mamit ten an tawiawm a ni.

Attachment

  • Loading attachment...