Young Mizo Association(YMA) Ni Bikah hian Mizoram chhung leh pawn a YMA member zawng zawng te duhsakna chibai ka buk che u a. Vawiin hi Mizo mipui te tan hun pawimawh a ni a, YMA hi Mizo Hnam tan Rohlu a ni tak meuh a ni.

Inkaihruaina tha tak hnuaiah YMA member ten in awmna hmunah theuh Mizo hnam tan tha leh zung, ngaihtuahna te bakah in hun hlu tak te seng in hna in thawk tawh thin a, in thawk chhunzawm zel tih ka hmuh hian ropui ka ti a, he pawl chak tak, YMA a lo awm hi Mizo te tan chuan vanneihna ni in ka hria. National Civil Society Organization(CSO) Award for Best campaign on voters education and awarness leh National Award for Outstanding Service in the field of Prevention of Alcoholism and Substance (Drug) Abuse dawng thei khawp a pawl hmingtha Mizoram in a nei hi a ropui tak tak zet a ni.

Ruihlo, hlemhletna leh hnam hmelma te lakah Mizo hnam venghim zel turin tun aia nasa zawk in pen chhuak ula, tanpui ngai te tanpui kawngah pawh in tha thlah dul chuang suh u.Thangthar lo la awm zel tur a te tan entawn tur hnuchhiah in Mizo hnam ropuina khawvel ah pho chhuak turin ka sawm a che u. Chutih rual chuan thalai pawl in nih angin in thalai pui te tan pawh eizawnna kawng kawh hmuhtu leh kawngdik a hruaitu nih tum theuh ula.Inchhehvel a chengte unau ah siam in hnamdang te pawh thiantha ah siam zel turin ka chah a che u.

Tlawmngaihna, aia upa zah thiam, tanpui ngai tanpui, lusun khawhar thlamuan, YMA hnatlang, thlanmual enkawl bakah sawrkar hmalakna thlawp a hna pawimawh tak tak YMA in a thawk kawp vek thei hi a ropui danglam bik ka ti a, ka rilru min hneh tak zet a ni. Hmun dang a NGO te pawh in YMA kalphung hi hmelhriat in entawn se a hlawk thlak hle in ka ring a ni.

He ni pawimawh tak denchhen a Mizo thalai te ka fuihna chu – midang te el pha turin thiamna leh theihna in nei a, tim hlek lohvin taihmakna nen theihpatawp chhuah phawt rawh u; chutih rual chuan in khawvel tukverh hawn zau erawh a la ngai a ni. Mizo tawng bakah Saptawng, Vaitawng leh hnamdang tawng chi hnih thum tal thiam tum ula, chu chuan in thiamna leh in chhawrtlakna te chu a let tam takin a tipung ngei ang. Midang thiam ang tal kan thiam emaw an aia kan thiam zawk phei chuan tumah kan huphurh ngai lovang tih Mizo thalai ten kan hriat thar leh a ngai a ni.

Mizoram chhung bik a YMA member te tan chona in hma ah ka chhawp duh a –Sairang chin bakah Mizoram chhim lam thlengin Rel a rawn lut dawn a, KMMTTP a puitling thuai anga, border trade a lo phuisui ve leh bawk dawn si a. Chumi hun atan chuan Mizo thalaite hi inlo in peihfel tawh em tih in zawt theuh ula. In lo la inpeih loh chuan hun tam in neih tawh loh avang in inpuah chah mawl mawlh ula, state pawn lam mi hnathawk a rawn lut te aia chhawr tlak zawk leh thiam zawk nih hman ngei hi in tan chona in hmachhawn ngei tura a ka rawn chhawp chhuah chu a ni.

YMA hi Mizo te ta a nih rual in Mizo te tan bakah huang zau zawka hmala turin pawl rintlak a ni tih ka chiang a. YMA member te u, India ram inpumkhat nan te leh NGO dangte tan entawntur hna tha thawk chhunzawm zel rawh u le. Hmalam pan in kal zel rawh u. YMA vul reng rawh se.