Thlaleh maia neih tur YMA general Conference chungchang thlir lawkin nimin khan Sub Committee peng hrang hrangte chu Sub Hqrs. YMA President Pu C.T. Mawia hovin Sub Hqrs. Office Diakkawn-ah an thukhawm a. YMA Conference vawi 66 na nuam leh hlawhtling taka neih anih theih nana thil tih tawhte an thlir ho a ni.

Khawmpuia kal tur hian Zoram hmun hrang hrang YMA Branch te chu a tam thei ang thawk chhuak turin Organising Committee chuan a sawm a. Kolasib khawthlang lawka awm Serlui B Hydel Project erawh chu furpui tam lai anih avang leh kawng a chhiat bawk avangin palaite chu tlawh tum lo turin an ngen a, hetih lai hian khawchhung daifema awm Rengte tlang sang Park erawh chu ngawrh taka chei chhunzawm zel a ni.

Conference atana inpuahchahna hian a vawr tawp a thleng tan mek a, sorkar department hrang hrangte pawhin an hmazawna an tih turte tiin committee peng hrangte nen thawh ho a ni. President Pu C.T. Mawia chuan Kolasib a sorkar officer te leh mi tlawmngaite in pekna avanga chak taka hmalak a ni chu lawmawm a tih thu pawh a sawi a ni.