Vawiin chawhnu dar 2:30 khan North Eastern Zone Cultural Centre (NEZCC) Dimapur leh Art & Culture Department, Mizoram tangkawpin an buatsaih Seminar-cum-Workshop on Mizo Folk/Traditional Art chu Multipurpose Cultural Complex Auditorium, Beraw tlangah khar a ni. He ni 3 awh seminar-cum-workshop kharna inkhawm hi Art & Culture Minister Pu P.C. Zoram Sangliana chuan a hmanpui.

Pu Zoram Sangliana chuan Mizo thil hlu leh nitin khawsakna hmanrua dehchhuah dan inzirtirna  buatsaih a ni chu lawmawm a tih thu sawiin, “Kan kut themthiam ten in thil zirte hi nangmahni tana eizawnna piah lamah kan hnam ziarang chawi nunna a ni tih in hriat thar ka duh a. Art & Culture department chuan hetiang lama kut themthiamte hamthatna tura ruahmanna tha tak siam hi a rilruk mek a ni” a ti. Pu P.C. Zoram Sangliana chuan kan hnam incheina leh pipute atanga kan hnam hmanrua leh bungbelte chawi lar deuh deuh hi kan zavaia mawhphurhna a nih thu sawiin; mahni hnam ziarang kan zahpui loh hian kan hnam kan chawimawiin, mi ten min ngaihsan pui dawn a ni a ti bawk.

He seminar-cum-workshop ah hian Mizoram hmun hrang hrang atangin kut themthiam mi 20 ten thu leh a takin belvuak te, thiamhnang deh te, milim ker te leh lemziak te riak lutin an zir bing a ni. He Workshop chhung hian Pi Saleha Ahmed, PFA (Sculpting) Jorhat leh Pu Maneswar Brahmo, MFA Guwahati ten zirtirna an pe a ni.

Vawiina workshop kharna inkhawm hi Pu Ngurbiaka, Director,  Art & Culture chuan a kaihruai a;  Pu Rosiamliana Ralte, Workshop Co-ordinator leh Most Rev. Bishop Stephen Rotluanga leh training chhimtuten thu an sawi bawk. Training chhuakte hi Art & Culture Minister chuan certificate a hlana ni.