Pu P.C. Zoram Sangliana, Art & Culture Minister chuan nimin tlai khan ni hnih awh Regional Seminar on ‘Resource Mobilization for College Libraries in North Eastern Region” kharna programme SCERT Auditorium a neih chu khuallian niin a hmanpui. He Seminar hi Government Aizawl North College chuan an thleng a, UGC, ICSSR NERC leh NEC ten an sponsor a ni.

Pu P.C. Zoram Sangliana chuan Library chu finna hnar leh thiamna peng pawimawh tak a ni thu sawiin college tehna a college tha ni tur chuan library leh library services changtlung tak leh tha tak neih a tul a ni a ti. Minister chuan Seminar paper  kaltlang hian Hmarchhak state-ah college hrang hrangah te Library enkawl, thuam that leh tih changtlunna kawngah hmathar a awm ngei a besisei thu a sawi a.  Seminar a tel te chu Library tih chak kawngah an mahni state theuh ah ngaituahna, thiamna leh finna te hmang turin a fuih bawk a ni. Minister hian Seminar-a tel te chu Certificate a hlan nghal a ni.

Seminar ah hian Hmarchhak state hrang hrang  atangin mi 70 vel an tel a ni.