Lunglei District High Powered Committee Vice Chairman Pu Joseph Lalhimpuia chuan vawiin khan HPC sum hmanga siam Weaving Centre Lungsen a mi a tlawh. Lungsen-a Weaving Centre hi HPC sum cheng nuai 10 senga bul tan  niin, tunah hian mi 15 in puantah an zir meka, heng puantah zirtute hi Dist Industries Centre chuan zitirtu pahnih pein an enkawl  mek a ni.

Vawiina helai hmun tlawhtu Pu Joseph Lalhimpuia chuan, hetianga harsa taka sawrkar leh khawtlang hruaitute hmalakna a taka hlawhtlinna  hmuh tur awm ta hi a lawmawm hle a ni tiin, puantah zir mekte pawhin eizawnna atana hmang ngei thei turin theihtawp chhuahin zir se a duh thu a sawi.

Hei bakah hian Pu Joseph Lalhimpuia chuan Lungsen a Weaving Centre chu Lunglei District tan Puan lama intodelhna tura hmun pawimawh tak anih dawn avangin hmasawn zawnga a  kal zel theihna turin Department lam pawhin hma la chhunzawm tura ruahmanna siam a ni bawk a ti. HPC  Vice  Chairman in helai hmun a tlawhna ah hian Lunglei Bawrhsap Pu V. Sapchhunga bakah Official thenkhat ten an tawiawm a, puantah zirlai naupang te hnenah HPC  Vice Chairman hian Stipend thla 12 chhunga an hmuh tur chu a sem nghal bawk. He hunah hian Lunglei District Bawrhsap pawhin thu sawiin HPC hmalakna avanga Weaving Centre Lungsena a awm ta hi a lawmawm hle a ni a ti a, tih tak takna nena bei turin puantahna a zir lai te a fuih a ni.