Ni 3 chhung awh Anthurium Festival 2011 chu vawiin khan a hmanna hmun Reiek Tourist Resort-ah khar a ni ta a, Mizoram Governor Pu Vakkom B. Purushothaman chu khuallian niin, Chief Minister Pu Lal Thanhawla chu khualzahawm a ni.

Governor Pu Purushothaman chuan Anthurium Festival kharna a tel tura Chief Minister sawmna chu lawmawm a tih thu sawiin, Mizoram Governor anih hnua vantlang inkhawma a telna hmasa ber a nih thu a sawi a. Governor chuan ram hmasawnna siamna kawngah kan pi pu te atanga kan chhawm, infiamna te, kut te leh thil dang tam tak (traditional games and arts) te a bo thin a. Chuvangin a humhalh hna hi tha taka kan thawh a ngai a ni, a ti. Kut chhim tura kal mipuite leh chanvo neite inthuamna rawng chi hrang hrang mawi taka an awm khawm chu, ‘hetiang anga rawng inchawihmawi hi ka la hmuh ngai lo a ni’ a ti a. Governor chuan a office in thuneihna tak tak a neilo nachungin politician anih angin a tam thei ang bera mipui te bula awm a duh thu a sawi a; functiona tel tura an sawmna apiangah kal zel a tum thu a sawi a ni. Ram tih hmasawnna kawngah theihtawp a chhuah tur thu sawiin, kan zavaiin i tang tlang ang u a ti a ni.

Khualzahawm Chief Minister Pu Lal Thanhawla chuan kalkhawm zawng zawngte chu anthurium chibai a buk a. Tourism tih chak nana central sorkar-in a tam thei ang ber kut phuahchawp siam tura state tinte a ti a ni, a ti a. India hmarchhak ah chuan Nagaland-a Horn Bill Festival hi kut phuahchawp lian ber a la nih hrih a ni a ti. Pu Hawla chuan khualzinmi te hian kawng tha tak tak leh in ropui tak takte hi an hmuh chak anih loh thu sawiin, kan ram mawina te, a chhunga nungcha leh sava awmte hi an nih ang anga hmuh an chak zawk chu a ni a ti a. Chuvangin hengte hi humhalh a khualzinmi te hip thei zawnga hma kan lak a tul hle a ni a ti a. Hemi atan hian an mamawh tur, thlen in tha leh an hmuh duh zawng kawhhmuh theitu kan awm a tul a. Chuvangin khualzinmi kaihruaitu nih theuh tuma tan la thar turin mipui te a sawm nghal a ni.

Anthurium Festival kharna a Chairman Pu S. Hiato, Minister for Tourism chuan anthurium festival hi Mizote kut anih loh thu sawiin, central sorkar-in tourism tih hmasawn nana kut phuahchawp siam tura mi tih anga siam anih thu a sawi a. Kumin November thlah Thalfavang Kut neih tum anih thu a sawilang bawk a ni.

Festival kharna ah hian Minister leh Parlimentary Secretaries engemaw zah an tel a, ram chhung mi te leh ram pawnlam mi ten an chhim bawk a ni. Mipui chhimtu an thahnem hle bawk a ni.