Krismas leh Kumthar vuakveta ruihhlo dona atan Mizoram hmun hrang hranga YMA Branch ten an hman tangkai turin vawiin khan Home Minister Pu R. Lalzirliana chuan a pisaah Central YMA hruaitute hnenah cheng nuai 10 a hlan. Hei hi CYMA leh Police Department leh Excise & Narcotics Department ten ruihhlo do kawnga an thawhhona kal zel a ni.

Home Minister chuan kan hma lawka hunpui lo awm turah mitin in him leh thlamuang taka hun kan hman tlan theih nan dan leh thupek khauh taka kalpui a ni ang, a ti. Pu R.Lalzirliana chuan Police leh Excise Department te bakah CYMA thlawpna leh tawiawmna avangin Krismas leh Kumthar hi hlim leh tluang taka mipuiin an hman ngei a beisei thu a sawi a. Hunpui lo thleng turah sawrkarin halpuah hal khapna thupek, traffic thuchhuak leh thupek dang a tihchhuah te ngai pawimawh a, mi dangte tana harsatna siam lo zawnga hun hmang turin mipuite a ngen a ni.

Sum inhlanna pual programme tawite buatsaihah hian Mizoram Police DGP Pu Thianghlima Pachuau leh IGP Pu Zorammawia bakah Central YMA hruaitute an tel a ni.