Ni thum chhung awh YMA Gen. Conference vawi 70-na Bairabi khelmuala “Zofate Run’ a neihah, a tawpna nizana palai thlahna programme hmannaah Chief Minister Pu Lal Thanhawla chu khuallian a ni.

Chief Minister chuan palai thlahna programme, zai leh lam, leh intihhlimna hun hmanna programme a thusawina hun siam sak a ni chu lawmthu a sawi a. YMA hi a kalphung leh a hnathawh that avanga chawimawina a dawn a vangtein India ramah hrelo an awm tawhlo a ni a ti a. Hruaitu thlan tharte a lawmpui thu sawiin, tha tak leh zahawm taka pawl hi an hruai theihnan a zuitu ten kawntinrengah that kan chhuah a tul a, Mizo kan nihnaah kan rinawm a, mi te tana malsawmna ni turin tanpui ngaite tanpuitu kan nih a tul a ni a ti. Chief Minister chuan kumpuan thupui ‘Ram leh Hnam Humhalh’ tih chu tha taka ti turin mahni theuh inhumhalh hmasak a tula a hriat thu a sawi a. Chumi tur chuan zuk leh hmuamah fihlim a, ei leh inah kan fimkhur a tul a ni a ti.

Tuikuk kan tih, Bru chungchang a sawiah Chief Minister chuan kum 1997 ah an mahni duhthuin leh an duhthlannain Mizoram an chhuahsan a, vawi tam tak lokir tura kan sawm pawha lo kir duhlo te chu tun hnuah an lo kir leh tulna kan hrelo a ti a. Hemi chungchangah hian pawl hrang hrangte nena kan thawhhona pawh a tha a, central sorkar ah pawh huaisen taka kan kalpui zel a tul a ni a ti. YMA in an ngenna ang leh tlawmngai pawl intelkhawmin central sorkar dawr tura an kalna tur senso ngaite chu sorkarin tum sak a remtih thu Chief Minister hian a sawi a. Kan zavaia kan tanrualnaah lawmthu ka sawi tiin, Zoram tan tan kan la zel tur a ni a ti.

Chief Minister chuan Zofate hi ‘Kumpinu’ sorkarin diklo takin min thendarh a, engtik hunah emaw chuan rorelna khatah kan la awm hi ka beisei tlat a ni a ti a. Tawng hrang hrang hmang nimahila, duhlian tawng kan tih, lusei tawng, tuna Mizo tawng kan tih hi Zofate min phuarkhawmtu a ni a, Zofa hnam hrang hrangten hrethiamlo kan awmlo a ni a ti. Tunhnaia Manipura Zohnahthlaktena an duh loh em em Bill pathum Assembly in a passed tak chungchanga Prime Minister hnena pawmlo tura lehkha a thawn chungchanga zawhna an zawh a chhan dan sawiin, Pu Lal Thanhawla chuan Manipura Zohnahthlakte hi kan thisen zawmpui an ni a, thisen hi tui aia a rih zawk avangin (‘Blood is thicker than Water’ tiin) humhalh an ngai a ni a tih thu a sawi bawk a ni. Chief Minister chuan YMA in ruihhlo a dona chu tha a tih thu sawiin, sorkar aiawhin YMA chungah lawmthu ka sawi a ni a ti a. Thawhhona tha tak an neih hi vawng nung chho zel turin YMA chu a sawm a ni.

Chief Minister hian palai hrang hrang, Bangladesh, Myanmar, Manipur, Tripura leh Assam atanga lokalte chu thinlung taka alo lawm thu a sawi bawk a ni.

Chief Minister hian YMA Group leh Branch anga Tuihna humhalh tha leh Ramngaw leh Nungcha humhalh tha thlan chhuah 3 te theuh hnenah lawmman a sem bawk a ni.

Palai thlahna programme ah hian Pu P.C.Lalthanliana, LAD Minister, Pu T.Sangkunga, MLA, Pu Pc.Zoramsangliana, MLA, Pu Vanlalzawma, MLA leh Pu Lalruatkima MLA te an tel bawk a ni.Conference a palai kal zawng zawng, langa kal tiamin, mi 5130 an ni.

Kum 2015-2017 chhunga hruaitu thar thlan te chu

President : Pu Lalbiakzuala

Vice President : Pu Vanlaruata

Gen.Secretary : Tv.Lalhmachhuana

Asst.Secretary : Pu R.Lalngeta

Treasurer : Pu J.Lalsailova

Fin Secretary : PuLalrochuanga Pachuau