Vawiin khan Secretariat Conference Hall-ah Mizoram chhunga Integrated Watershed Management Programme (IWMP) hmalakna leh hnathawh hrang hrangte a hunbi a en ho leh thlirhona neiin Mizoram Watershed Development Agency (MzWDA) Executive Meeting neih a ni a. Pu R. Lalzirliana, Rural Development Minister in a hmanpui.
Power point presentation hmanga chiang zawka hnathawhna zirhona leh thlirhona neih theih a ni chu a lawmawmin chona nasa tak ni thei se a duh thu khuallian Pu R. Lalzirliana chuan a sawi a. He thlirhona hian thawktute tan chona nasa tak ni thei se, mi aiin ka che chhe bik em, Zoram leh mipui tan enge thil chhenfakawm ka thlen tih rilru te put nan hmang thei se a duh thu leh kan hnathawh ah hian mi ten enge an hmuh sum lo kalah enge kan thawh tih in en let a hmuh theih nise, a ti bawk.
RD Minister chuan Rural Development a thawktu te hi miretheite nena inngheng riala thawk an nih bakah heng sum lokalte hi thawktu leh officer ten lo awta mahni invulh nana siam lovin a kalna turah kal se tiin hotute nena thawhho kawngah mipuite chanai sat thla lovin, mahni tana sum lo insem te ching ve lo turin a fuih a. An hnathawh tawhna ah a tha lai chauh pholang lova a chhe lai leh chak lohna lai pawh pholang hreh lo turin a fuih a ni.
He meeting Pu Lalhmingthanga IAS, Secretary RD kaihhruai ah hian district hrang hrang atanga local ten an district chhunga an hmalakna leh hlawhtlinna te power point presentation hmangin an en tir a, sawiho zui nghal a ni.
IWMP hian a tuam chin project-ah ram buai leh leilung luang ral tur vente leh humhalh lam a thawk ber a, hemi atan hian major activity hrang hrang Land Development, Soil & Moisture Conversation leh Water Harvesting Structure te hi kalpui anni a. Chumi atan chuan Programme dang kal vet e nen pawh thawhho thin a ni bawk. Project tuam chin khua te zingah mi harsa zawkte eizawnna ruahhman sakin bul a tanpui thin a, hmalakna reng reng hi mipuite hriatpuina leh tel ve naa duana siam thin an nih avangin hnathawh a lang tlanga a chhawrtu berte chu mipuite anni bawk.
Tun dinhmunah Mizoram District 8 chhungah IWMP hnuaia hmalakna ah hian project 98 kalpui mek in khua 303 a tuam mek a, heng zing atang hian project 16 chu tun kum hian zawh fel tum a ni.
