Sports and Youth Services Department-in a vawikhatna atan ni 4 awh (April 22 -26) thalai te puala Youth Festival a buatsaih chu nimin chawhnu khan Multipurpose Cultural Complex, Beraw Tlang-ah a kharna programme hman a ni a, Education Minister Pu Lalsawta’n Festival kharna programme hi khuallian niin a hmanpui a. Festival chhunga inelna hrang hrang neih a titha te hnenah lawmman a sem bawk. Pu R. Lalvena, IAS, Secretary, Sports & Youth Services pawhin kharna programme hi khualzahawm niin a hmanpui a ni.

Pu Lalsawta chuan thalai te tana hetiang hun remchang leh programme hlimawm Sports & Youth Services in a ngaihtuah chhuak leh a buatsaih chu fakawm a tih thu a sawi a. Thalai te tan hun remchang leh hun tha buatsaih a tam lo chu pawi tiin thalai te puala intihhlimna leh zirna piah lamah an rilru sawizawina remchang siam anih chuan thalai te rilru a hahdam in an nun a hlim theih thu a sawi a. He Festival hmangtu te’n Festival atangin thil tha an zirchhuah leh an hlawkpui ngei a rin thu sawiin an mimal nunah theuh a rah tha an seng ngei theih nan duhsakna a hlan bawk a ni.

Pu R. Lalvena chuan thalai ten he Youth Festival-a an tawnhriatin leh thil tha zir chuan nakina hun harsa leh khirh an tawn pawh a, a paltlang dan a zirtir ngei a beisei thu a sawi a. Thalai ten hun awl tangkai taka an hman a pawimawh a tiin hobby te nei turin a chah bawk a ni.

Kharna programme hi Sports & Youth Services Director, Pu Lalzirmawia Chhangte chuan kaihruaiin Pu Lalngilneia Kawlni chuan Festival an hman dan chanchin tlanpui a tarlang a. Pu Thankhuma, Youth Welfare Officer in lawmthu sawiin hun hi a khar a ni. Youth Festival hi Sawrkar laipuia Ministry of Sports & Youth Services in an sponsored a ni a.

Festival ah hian District hrang hranga zirna in sawmbik atangin sikul naupang 350 vel an riak lut a. He festival-ah hian Mizo infiamna chi hrang hrang ah te, lem inziahsiak ah te, thalakna ah te inelna siam a ni a. Adventure activities te, Intellectual leh Arts programme te leh AIDS/HIV awareness programme te neih a ni bawk.