Vawiin khan Agriculture Department chuan ICAR leh KVK te nena tangkawpin ‘Cultivation of Kharif Paddy in Mizoram’ tih thupui hmangin Workshop an nei. He Workshop Inaugural Session kaihruaitu Agriculture Director, Dr. C. Lalzarliana chuan Mizoram buh leh bal thar chhuah lama hmalam pan zel tura Sorkarin hma a lak mek laia ICAR mi thiam te, KVK lama mi thiam te leh Agriculture Department-a mi thiam te leh field-a thawktute nena hlawk zawka buh thar chhuah dan tur chungchang sawihona buatsaih a ni chu lawmawm a tih thu sawiin, thiamna leh technology thar zel te hmanga loneitute zirtir chu Department-a thawktute mawhphurhna lian tak a ni a, Sorkar lama thuneitute pawhin he lama chak taka ke pen turin min beisei tlat a ni, a ti bawk.
A sawi zelnaah Dr. C. Lalzarliana chuan tlangram loneih tlahniam zel si a, Agriculture thiamna hmanga buh thar tlahniam chuang lo tura tan la zel tur te, leilet leh terrace te tangkai lehzuala hmang a, a theihna hmunah chuan buh chi tha chi hmanga kum khata buh vawi hnih thar thei zel tura tan la chhunzawm turin Officer kal khawmte chu a chah bawk.
Workshop-ah hian Dr. Basanta Singh, Joint Director, ICAR, Kolasib Centre pawhin thu sawiin Mizoram mai ni lo, hmarchhak State-te pawhin buh hi kan ngaipawimawhin ei tur tha dang eng pawh ei ila, buh a nih loh chuan chaweiah kan inngai ngai lo a ni, a ti. Kan buh thar te tipung tur chuan ruahmanna fel tak neih a ngai a, kan leilung enkawl leh sawngbawl dan te, buh chi tha thlan a pawimawh thu te a sawi bawk. Dr. Basanta Singh chuan hmarchhak State-te tana tha tur buh chi engemaw zat an enchhin tawh thu leh an enchhin mek zel thu a sawi bawk.
He Workshop Technical Session hi Pu C. Lalniliana, Director of Agriculture (R&E) chuan kaihruaiin topic hrang hrang zirho a ni a. ICAR, Kolasib atangin Dr. Y. Ramakrishna chuan Mizoram sik leh sa leh leilungin a ngeih tur buh chi tha chi hrang hrang chanchin a sawi a. Pi Lalnunpuii Parte, Programme Coordinator, KVK, N. Vanlaiphai chuan KVK farm hrang hranga buh chi hrang hrang an lo enchhin tawh, Mizoram tana tha tur nia an hriat te zirtirna a pe a, Pu J. Rothanga, SO-cum-SA chuan SRI leh Improved Package of Practices hmanga Mizoram hmun hrang hranga hlawhtling taka buh chin a nih dan te a tarlang bawk. He Workshop-ah hian kum 2013-a hlawk taka buh chin a nih theih dan tur chi hrang hrang an sawiho nghal bawk.
Agriculture Department hian January atanga March, 2013 chhunga District hrang hranga an hmalakna hrang hrang leh kum 2012-13 chhunga an hnathawhte thlirletna hun ni 25.4.2013 khan an lo hmang tawh bawk.
