Mizoram Tourism Department chuan December thla chawlhkar hnihna lo awm turah khian ‘Youth Festival’ puitham tak a buatsaih dawn.
Hemi chungchang ngaihtuah hian vawiin khan Pu T.T. Zothansanga, Parliamentary Secretary for Tourism hovin a office chamber-ah mi pawimawhte an thukhawm a. Youth Festival neih hun atan hian December 10 - 12, 2014 an ruat a, a hmun atan Tuirial Airfield nise an ti a ni.
Pu T.T. Zothansanga chuan thuhma sawiin Mizote mamawh phuhruk tura Youth Festival buatsaih a ni tur chu thalaite tana intihhlimna leh inhnangfakna changkang tak tur anih thu sawiin, member kalkhawmte chu an theih anga chaka hma la a, Festival tihlawhtling tura tha thawh turin a sawm a. A bul kan tan fuh chuan nakin zel atan Tourism lama hmasawnna tur a ni, a ti a. State pawnlam thleng pawha Mizote min phochhuaktu tur a ni, a ti a ni.
Youth Festival hi lian tham taka buatsaih tum a ni a. A buatsaihna tur hian NEC atanga sum a lo kal dawn thu Tourism Director Pu Vabeiha Hlychho chuan a sawi a ni.
Festival hi mitin ten an hlimpui leh an inhnangfak theihna tur te, khual tha state pawn amite thleng pawha huapzo tur khawpa buatsaih a ni dawn a. Food Festival, Music Festival, Handloom & Handicraft exhibition te, Photo & Painting exhibition bakah carnival te thlenga chhawpchhuah a ni ang a. Adventure sports lam para-gliding leh joy ride te, bike show te bakah climbing wall, spider web, commando bridge leh rifle shooting te buatsaih a ni bawk dawn a, tlawhtu mipuite tana hlimna kut anih theih nan heng sports item te hi tih ve theih tura ruahman a ni dawn a ni.
Youth Festival neihna tur Tuirial Airfield hi a hmun a zau tawkin heng tarlan item zawng zawng hi a leng vek tih meeting-ah hian tarlan a ni a. Hmunhma chik zawka en vat nise, ruahmanna pawh chak taka kalpui turin vawiina Pu T.T. Zothansanga hova meeting hian an rel a ni.
