Vawiin khan State Referral Hospital, Falkawn hungchhung sam fail leh hemi huam chhunga thingphut-te hungtha in Save Environment Association(SENVA) volunteer 50 chuangte chu an hnatlang a. Environment & Forest Minister Lalrinmawia Ralte chu SENVA hnatlang zingah tel ve in hnatlang hming ah hian “HNUH LAK” tih a hman a ni.

State Referral Hospital Conference Hall ah programme tawi siam a ni a. He huna thusawitu Environment & Forest Minister Pu Lalrinmawia Ralte chuan Corporate, Company leh sumdawng hausa ten ramngaw nasa takin an ti chereuva, heng ho lakah hian ram leilung hmangaihtu leh ram hruaitute hi kan thikthu a chhiat a hun tawh a, mipui rohlu- ramngaw leh nungcha-te an tih chhiat man hu hi an lakah kan phut ve tawh a ngai a. Chu chu mipuite hnena an bat liau liau a ni a ti. Global Warming leh sik leh sa inthlak nasa lutuk tih ziaawmna leh lo dolet ve theihna chu thing phun uar leh thingphun leh thing ding sate humhalh a nih thu a sawi a. Nungcha te tihhlum loh leh ram hmul humhalh ringawt hi ramsa humhalh nan leh an nunkhawchhuah nan a tawk lova; thing par chi leh rah chhuah chite ramsa chaw atan kan phun uar a tul tel a ni a ti.

SENVA te chuan kum 2009 a Sawrkar Department hrang hrang ten Green Mizoram Day an hman tuma thing an phun te kha an enkawl chhunzawm thu sawiin kum 2011 leh 2013 inkar pawh khan State Referral Hospital hmunhma te hi lo thlo fai tawhin achhunga thingphun te pawh an hungthat tawh thin thu an tarlang a ni.