Vawiin chawhma khan Chanmari YMA Hall ah Mizoram State Cancer Institute (MSCI), DHME hnuaia Non Communicable Diseases Cell(NCDC),Cancer Society of Mizoram(CSM) leh Mizoram Cancer Care Foundation (MCCF) tangho chuan Hnute Cancer veite enkawl dan, invendan leh cancer lo intan tir hriat chhuahdan chungchangah mipui zirtirna an buatsaih a. He hunah hian Health Minister Pu Lal Thanzara, Pi Vanlalawmpuii Chongthu, MLA, Chairperson, Mizoram State Commission for Women leh Health Department hotute an tel a ni. October thla pum hi Breast Cancer Awareness Campaign thla ah khawvel ram hrang hrangah hman thin a ni. Breast Cancer awareness programme hi hnute cancer vei inekawl mek-te, Hnute cancer vei dam tawh te, MLA nupui-te leh zirlai ten an chhim a ni.

Breast cancer awareness programme a thusawitu, Health Minister Pu Lal Thanzara chuan hnute cancer chungchanga mipui zirtirna te chu Pi Vanlalawmpuii Chongthu, Chairperson, Mizoram State Commission for Women ngenna angin District 8 ah kalpui a nih tur thu a sawi a. Health Minister chuan natna chi hrang hrang zingah cancer chu ei leh in a fimkhurna, zuk leh hmuam laka insumtheihna bakah insawizawina uar taka kalpui chuan pumpelh theih a ni a ti. Mizoram ah state mipui tam zawng phu lova cancer a hluar em em mai chu ram mipuiten ten hriselna kawnga kan in enfiah tul zia ti langtu a nih thu a sawi a. State sawrkar in cancer veite a thlahthlam lova, State Cancer institute chu khum 100 awmtheihna, khawl chikim a thuam a nih theihnan DPR leh a tul dang te peih vel a ni tawh a ni a ti. Mumbai khua a Mizoram house ah pawh cancer vei te leh a zuitu mi pakhat tan thlen man zan 15 riah hnu a pung vak thin pawh Sawrkarin Cancer veite hmakhua ngaiin a tihniam tawh a ti a ni, a ti bawk. Minister hian MCCF te lehkhabu buatsaih, “ Lungngaihna piah a malsawmna” tih ziaktu 28 te kutchhuak pawh a tlangzarh nghal a ni.

Hnute Cancer damchhuak ta te aiawh a thusawitu Dr. K. Ropari, Principal Director, H&FWD chuan cancer veite rilru put hmang leh ngaihsak an tulna lai te a tarlang a. Hnute cancer veite hian inthlahrunna leh midangte hriata an natna vei sawichhuah an harsat thin avangin enkawl theihlohvin an natna vei te a lo punlun hman thin thu a sawi a. Hnute cancer hi hriatchhuah hma chuan tihdam theih a nih avangin a veite chu inthlahrung lova doctor-te rawn thuai turin a chah a ni.

Breast cancer hmuhchhuahdan leh enkawlna chungchangah Dr. Lalsiampara, Director, MSCI; Dr. Eric Zomawia, State Nodal Officer, NCDC; Dr. B. Zothankima, HOD, Radiation Oncology, MSCI; Dr. Saia, HOD, Surgery Department, Civil Hospital, Aizawl leh Dr. Jeremy L. Pautu, HOD, Medical Oncology, MSCI ten zirtirna an pe a. Heng mithiam te tarlan dan chuan breast cancer chu mahni a hmuh chhuah theih leh hmuhchhuah hma a nih chuan enkawl dam theih a nih bakah nundan hrisel zawm a nih chuan pumpelh theih a nih dan te an sawi a ni. Hmeichhia kum 20 chin chunglam thlabi a thi nei te chuan Hnute cancer an neih leh neih loh hi an thineih atanga ni 7-na leh 15-na inkarah uluk taka dap in an en thin tur a ni a. Thi hul tawh leh chhul paih tawhte pawh in thla tin an in enfiah ve tho a ngai bawk a ni. Hnute cancer lanchhuah dan chu hnute a bawk lo awm, hnute vunrawng danglam, hnute hmur tlum, hnute hmur atanga tuihnang leh tuiril danglam chhuak leh hnute vun chhah dan danglam ah te a ni a. Heng danglamna lo awm te hi hmuh chhuah a nih chuan a ranglam a doctor-te entir a tha ber a ni mithiam te hian an ti a ni. Hnute cancer hi mahni rihna tur bituk aia tama rit leh thau-te, zuk leh hmuam tih ching, zu in mite, hriak leh hmuihmer, sa tisen lam einasa leh insawizawina lam thlahthlam te bakah Cancer vei-te cchhungkhat hnaivai ten an vei sam bik tih tarlan a ni. Doctor te hian thlai hnah, thlai rah, thei chi hrang hrang leh lui lam sa te eitam a that thu an sawi a. Mizo hmeichhia-te’n nasa zawka insawizawina an uar a, ei leh in bakah zuk leh hmuam a insum an theih chuan hnute cancer vei hi reilote chhung in an tlem zawk ngei a rinawm a ni an ti. Doctor-te hian mipa pawh in hnute cancer hi an vei ve theih thu an tarlang bawk.

Breast Cancer awareness month hi 1985 atang khan USA ah hman tan tawh niin tunah chuan khawvel pum huap campaign-na a lo ni tawh a. Breast Cancer chungchanga mipui zirtirna tih darh zau nan hian ribbon sendang(pink ribbon) chu chhinchhiah na atan hman a ni. Vawiin a awareness programme ah hian cancer vei dam tawhte leh cancer veite tana hmalatu pawl 2 te hnen atang in fuihna leh hnute cancer hmachhawn dang chungchang te ngaihthlak a ni bawk a ni.