1136/2023-2024

Lunglei, the 14th July, 2023: Vawiin khan Nehru Yuva Kendra (NYK), Lunglei buatsaihin Higher And Technical Institute of Mizoram(HATIM) Conference Hall Kawmzawl Lungleiah ‘Yuva Utsav Lunglei District Level Youth Festival’ neih a ni. He hunah hian Dr. Vanlaltanpuia MLA, Mizoram Youth Commission Chairman chuan khuallian niin a hmanpui a ni.

Dr.John Lalduhsaka Co-Ordinator, IQAC kaihhruai Youth Festival a khuallian Dr. Vanlaltanpuia MLA, Mizoram Youth Commission Chairman chuan thu sawiin, India ramah hian hnathawk thei thalai kan tam em em a, he hun hi thalaite hian hman thiam a ngai a, inelna tha hmachhawn turin kan inbuatsaih a ngai a ni, a ti. Dr. Vanlaltanpuia chuan India ramah zirna kalphung (education system) te a danglam zel a. Hetiang zirna kalphung danglam zel hi Zirlaite hian kan luhchilh thiam chuan hmalam hun atan kawng zau tak a inhawng tih kan hriat a ngai a. Chu kalphung thar lo chhuak zel hmanga kan hmalam hun thlir a kan khawvel tizau tur chuan thawhrim erawh a ngai tih kan hriat reng a pawimawh, a ti.

Dr. Vanlaltanpuia MLA, chuan Mizo thalaite chu nasa takin zirna lamah hma kan sawn tawh lai leh Saptawng pawh kan thiam em em laiin Science leh Mathematics ah nasa zawka tan kan lak a tul hle a ni tiin Saptawng bikah pawh kan thiam viau laiin tawng dik leh lam dan dik kan zir nasat a la ngai hle a ti a. Tunlai khawvel hmanraw tha leh changkang tinreng kan neih tawh lai hian khawvelin zirna an kalpui dan te, ramdang thalaiten hmasawnna an kalpui dan te hriat zau tumin tum sang tak neiin thawhrimna nen tan la thar ila, tum mumal tak neiin, investment tha ber chu keimahni kan ni tih hria in rilru i siamthar ang u, a ti a ni.

He hunah hian Pu Donny Lalruatsanga Additional DC Lunglei chuan thu sawi bawkin, India ramin zalenna a neih theihna tura an nunna hlantu zawng zawngte thangtharte hian kan zah a, ram tana an inpekna kan hriat reng a tul a ni, a ti a. Zalenna India ramin kan neih hnuah zirna lamah te hriselna lamah leh kawng hrang hrangin hma kan sawn a, tunah chuan ram changkang leh ram ropui takah India chu a in hlangkai tawh a ni tiin, heng zawng zawng hi ramin zalenna a neih theihna tura an nunna hlu tak hlantute vang a ni tih hi thangthar te hian hre thar leh ang u,a ti a. He zalenna hnuaiah hian mahni zawn theuhah hlawhtlinna nei turin bei ila, ram leh khawtlang tan i inhlan thar leh ang u, tiin kalkhawm te a chah a ni. He hunah hian Pi Mercy Sellate, Deputy Director NYK chuan kalkhawmte lawmna thu sawiin, NYK in Mizo thalaite hmakhua atana hmalakna chi hrang hrang a neih dan te leh chutiang avanga thalai eizawnna mumal tak nei tam tak an awm tawh thu te a tarlang.

Pu Vuansanga Vanchhawng, Principal HATIM chuan programme khar nan thu sawiin zirlaite chu kawng hrang hrangah an hlawhtlin theih nan dikna, rinawmna leh takna nun an neih a ngai a ni, tiin fuihna thu a sawi bawk.

Chawhnu lamah Declamation contest leh Cultural Programme hman niin, exhibition leh food stall hrang hrang siam a ni a, Yuva Utsav puala zirlaite tan intihsiakna chi hrang hranga titha te hnenah lawmman sem a ni bawk.

Yuva Utsav-ah hian ‘Panch Pran’ tih chu thupui atana hman a ni a. India ram chu ram hmasawn zawk, saltanna rilru atanga zalenna siam te, hnam ziarang leh hlutna chawisan te, inpumkhatna leh ram leh hnam tana inpekna thinlung pu tura tanlak te chu a thu ken pawimawh panga te an ni.