Chief Minister Pu Lal Thanhawla chuan ‘zai leh rimawi hman hi Pathian kan pawlna pakhat a ni’ a ti. He thu hi nizana Presbyterian Church of India (PCI) ina Concert for Dimasa Vanapa Halla a buatsaiha a sawi a ni.

Chief Minister chuan zai leh rimawi hi Mizote nunphunga hmun pawimawh tak luahtu a ni tiin, kan thih pawhin kan zai a; hei hi kan danglamna tak a ni a ti. PCI in Dimasa te zingah kawng hrang hranga chanchin tha an hrilna te chu lawmawm a tih thu sawiin, an rawngbawlna tichaktu atana concert an buatsaih chu a inhmeh hle a ni a ti a. Pathianin a thil siam zawng zawngte chunga chanchin tha hril tura min tih hi kan hlen thei anih chuan inchimral kan hlauhna te hi a awm theih a rin loh thu a sawi a. Zai leh rimawi hmanga Pathian fakna hi Bible ngeiah pawh hriat theih anih thu sawiin, Exodus 15:1 te, Number 21:17 ah leh Isaiah 51:11 ah te tarlan anih thu a sawilang a ni. State dang atanga zaithiam lokal te hian a programme a ti ropui hle a ni a ti.

Dimasa te hi Assam a North Cachr Hills ni thin, tuna Dima Hasao Autonomous District ni ta a cheng, Kachari tia kan hriat thin te kha an ni a, Haflong hi an khawpui a ni. Dimasa te hi Hindu an ni a, an zinga chanchin tha hril hi a khirh hle a. Kum 1905 daih tawh khan sap hoin missionary an lo tir tawh a, catholic leh baptist kohhrante pawhin hma an lo la tawh bawk a ni. Kum 1972 in PCI  in hma la ve tanin tunah hian Bible chhut thar tur buatsaih mek a ni a, chumi atana he concert hi buatsaih a ni nghe nghe a ni. Dimasa Kohran anga sawi theih chu Doyapur, Nagaland ah Baptist biakin a awm a, an district chhungah biakin 3 leh Haflongah 1 sak mek a awm bawk a ni.

Dimasa Mission tan hian thawhlawm bawm hun a ni a. Concert hawnna hi Rev Dr. L.S.Khawbung, Moderator, PCI in a kaihruai a. Concertah hian zaithiam Rev Terrence William Wanshong, Shillong, X-Strings Band, Aizawl, Henry L. Varte, Aizawl, Rev W.K.Hujon, Shillong te an zai a ni.