North East Consultancy Services(NECS) leh Mizoram Football Management Group tangkawp buatsaih, NECS Charity Cup 2012 a Aizawl Football Club leh Mizo Professional Footballers ten nmina lammuala an inkhelhah Chief Minister Pu Lal Thanhawla chuan a hmanpui.

Inkhel en tura mipui kal khawmte hmaa thusawiah, Chief Minister chuan Lungleia Thuamluaia Mualah zana inkhelh theih nan eng dah anih thu sawiin, Lammual pawh hi kan hman ber anih avangin, Assam Rifles ten an  phal anih chuan(floodlight) dah ve a ni ang a ti. Chief Minister chuan infiamnaah Mizo thalai ten chak taka hma an sawn thei chu a lawmawm hle a ni a ti a. Association hrang hrangte pawhin Mizoram State Olympic Association kaihhruaina hnuaiah hmasawnna an nei hi a lawmawm hle a. Football hi eizawnna tlak a ni tih hriain kan thalai ten footballah an thawh hlawk chho ve zel a, a mimal angin hming chher chho kan awm thei ta zelte hi a lawmawm a, Club angah chuan kan la awm rihlo a ni a ti a. Tunah hian Aizawl Football Club hi chutiang ni thei tura hmalak tan a ni hi a lawmawm hle a ni a ti.

Charity Cup inkhelh buatsaihah, mi kuttawrh avanga natna khirh tak tuar mek, naupang Sarah tana hun siam a ni chu, Chief Minister chuan  Sarah sawisatu chu mi nunrawng tak a ni tih a chiang a, danin a hremna chu a lekkawh tur a ni a, dan hi tute pawhin kan zah tur a ni a ti.

He hunah hian Home Minister Pu R.Lalrirliana chu khualzahawm a ni a, Chief Minister hi a nupui Pi Lal Riliani’n a tawiawm a ni.

Inkhelhah hian Mizo Professional Footballers te hi an chak a ni.