Mizoram Board of School Education (MBSE) buatsaihin vawiin khan I&PR Auditorium, CHANEM-ah Champhai District chhunga High School leh Higher Secondary School zirtirtute tan zawhna siam dan 'Training on Question Setting Technique' tih thupui hmangin nikhat awh training buatsaih a ni.
He hunah hian Mizoramah Board Exam pass parcentage kum tinin a sang mek laia, Mizo zirlaite India ram chhung leh ram pawna zirlai dangte nena an inelnaah a ti tha lo leh a hniam zawkah an tang leh fote chu ngaihmawhawm anih thute tarlan a ni a. Mizoram State aia lehkhathiam tlem zawkna state te'n Central service exama an ti tha fo te chuan Mizoramah quality education kan kalpui tak tak angaihzia tilangtu anih thu leh, Zirchianna hrang hrang neih hnuah exam-a zawhna set dan hian pawimawhna thuk tak a nei a, zirlaite leh zirtirtuteah nghawng nasa tak a nei tih hmuhchhuah a nih thu tarlan a ni a. MBSE pawhin kum 2020 HSLC leh HSSLC exam atanga hman turin exam dan kalphung leh zawhna zawh dan thar a duang a, hemi zulzui hian kumin atangin zirtirna pawh kalpui mek anih thu tarlan a ni bawk. Hemi hmang hian Content-based question atanga competency based question tam zawk zirlai naupangte tana chhawp chhuah sak tur niin, hei hian an ngaihtuahna hman thiam kawngahte, an hmalam hun atan leh school-a zirna kalpui danah tha zawka nghawng a neih beisei a nih thu he hunah hian tarlan a ni bawk.
Resource Person Pu C. Laldinpuia, Senior Academic Officer leh Pu Jonathan Lalrinmawia, Academic Officer, MBSE te'n zirtirtu kalkhawmte hnenah MBSE siam kum 2020 Board Exam atana hman tan tur Scheme of Examination and Question Design bakah Integrated Evaluation Scheme (IES) Software update thar leh software mannual chungchang an zirtir a. He training-ah hian IES Software tha zawka thuam that chu a hman dan (User Mannual) sem nghal a ni.
