Pu K. Lalrinthanga Parliamentary Secretary, LAD etc chuan Nimin 29th May 2014 khan Zawlnuam Vengpui (Lokicherra) Platinum Jubilee leh he khua Village Council kum 50-na Diamond Jubilee lawmna khuallian niin a hmanpui.
Hemi puala inkhawm Community Hall, Vengpui-a buatsaih PU C.T Sanga kaihhruaiah thusawiin kan pi leh pu mi thahnem ngaite’n hah takin helai hmun, leilet atana an lo satchhuak hi a ropui hle a, chu chu an tu leh fate’n kan rochun thei hi kan vannei hle a ni a ti a. Khuallian chuan zoram hmun thenkhatah chuan mi engngemaw zat leilet te hnam dang vai hovin an chhuhsak tawh thusawiin Zawlnuam area ah chuan ramri fel taka siam anih avangin chutiang harsatna chu a thleng lo mai thei, mahse kan fimkhura kan ram neihte mahni ngeia enkawl hi a him ber a ni tih hre thar turin mipuite a chah a, kan ram kan enkawltir hnamdang zoram chhunga piangten ram mi nihna an rawn phut chuan harsatna kan tawk theiin thangtharte pawisawitu kan ni thei a ni tih kan hriat a tul takzet a ni a ti bawk.
Khuallian chuan Village Council te dinhmun pawimawhzia sawiin Ram leh khawtlang hmasawnna kawng hrang hranga hnathawktu an nih bakah ram leh hnam humhalhtu an nih avangin mawhphurhna sangtak an kovah a in nghat a ni a ti a, an khua leh tui mipuite enkawlna kawngah pawh thlei bik nei lova khai rual taka hna thawk turin a chah bawk a ni.
Khuallian chuan hmasawnna hrang hrang tarlangin kawlphetha (Hydro Electricity) lamah sawrkarin chak takin hma a la mek a, Tuirial Hydel Project Megawatt 60 pechhuak thei 2015-ah hman hmana hawn tum a niin Tuivai Hydel Project Megawatt 200 pechhuak thei pawh bul tan tep anih thu te, Tuikhuah hrang hrang atangin Megawatt 3000 vel project hrang hrang atangin siam thei tura ngaih a nih thu a sawi bawk.
Tuialhthei lakchhuahna kawngah pawh hmasawn chhohzel a niin Bilkhawthlir ah tanin Bualpuiah chhunzawm leh a ni a, Bairabi bul, Meidum ah Gas Deposit engngemaw zat a awm tih hmuhchhuah a ni a, lakchhuah a nih theih nan hmalak mek a ni a ti, Keifang ah te, Maubuang bul Lungsai hmun leh Thenzawl ah te Gas a awm ngei nia hriat a ni a, verh turin buatsaih mek a ni a ti bawk.
Khuallian chuan Lokicherra khua a Village Council members lo ni tawh te hnenah chawimawina thuziak (Citation) a hlan bawk a ni.
Pu H. Lalengmawia IAS, Joint CEO khualzahawm pawhin he hun hi hmanpuiin thu a sawi bawk a ni.
Zawlnuam Vengpui (Lokicherra) Platinum Jubilee leh V/C Diamond Jubilee lawmna ah hian hnam lam chi hrang hrang entir a nih bakah zaithiam hrang hrang te leh fiamthu thiam ten mipui an awi bawk a ni.
