Tukin zing khan Serchhip Bawrhsap Dr. Lalrozama, IAS chuan Serchhip District chhunga vawiin atanga neih tan tur; naupang kum 5 hnuai lamte hnena Zenghri danna pek beihpui thlak thawhkhatna (IPPI First Round) chu New Serchhip Bazar ah a hawng. 

Dr. Lalrozama chuan, India ram chu Zeng hri awm tawh lohna rama puan ni tawh mahse he natna hrik hi kan thenawm ramahte a la awm avangin inthlahdah zui mai theih a la nilova. Thenawm ramte nena intlawhpawh tawn reng kan nih avangin engtiklai pawhin kan la kai thei reng a ni. Hei vang hian Zenghri danna vaccine hi sawrkar chuan a la kalpui zela, vawiinah pawh kum 2017 atana a thawhkhatna neih tan leh a ni, a thawh hnihna pawh March thlaah neih leh a ni ang, a ti. Bawrhsap chuan, District chhung khaw tina nu leh pate chu an fa, kum 5 hnuai lam zawng zawngte kim tak lak tir tura ngenin, an khuaa mikhual lo zin leh hnam dang kum 5 hnuailam awm zawng zawngte pawh pek vek tur a nih thu a sawi a ni. 

Tukina IPPI District Launching Programme ah hian District Task Force on Immunization Committee member leh thawktu dangten Bawrhsap hi an tawiawm a ni.

IPPI First Round ah hian Serchhip District chhungah naupang kum 5 hnuai lam mi 6271 vel awm tura chhut a ni a, a pekchhuahna hmun tur Booth hi 71 a awm bawk. Vawiin hian thawktuten heng Booth 71 atang hian damdawi hi an pe anga, naktuk Dt 1-2 Feb chhung hian khaw tina intinte lut chhuakin Booth-a damdawi la ve hman lote zawn chhuah hna an thawk anga, an chenna inah damdawi hi an pe thung ang. Chumi hnuah Supervisor ten khawtina naupangten damdawi an dawn vek leh vek loh an enfiah nawn leh vek bawk ang.