1815/2025-2026

Lunglei, 2025 Khuangchawi thla ni 9: Vawiin khan Lunglei District Task Force on Immunisation (DTFI) chu an Chairman, Lunglei District Bawrhsap Pi Navneet Mann hovin Lunglei DC Conference Hall-ah an ṭhu khawm a. October ni 14, 2025 aṭanga India rama district thlan bik ṭhenkhata zenghri danna (polio vaccine) pek runpui, Sub-National Immunisation Day (SNID) buatsaih tur chungchang leh Lunglei District-a SNID kalpui dan tur an sawi ho.

He hunah hian DTFI Secretary, Lunglei District Immunisation Officer Dr Christina Zonunmawii chuan a lem nen SNID hman dan tur ruahmanna leh Lunglei District-a inbuatsaihna dinhmun a sawi fiah a. Lunglei District-ah hlawhtling taka zenghri danna pek runpui hi kalpui a nih theih nana ruahmanna leh rawtna hrang hrangte sawi ho a ni.

Kumina India ram puma SNID kalpui turah hian Mizorama health district pali - Champhai (Champhai leh Khawzawl district), Lunglei (Lunglei leh Hnahthial district), Lawngtlai leh Siaha district-te thlan a ni a. SNID kalpui chhung hian naupang kum 5 hnuai lam, October ni 14, 2020 hnu lama piang chinte chu zenghri danna kaa thlawr chi (Oral Polio Vaccine - OPV) far hnih ṭheuh pek vek tum a ni.

Lunglei District-a SNID kalpui turah hian zenghri danna pek tur naupang 12,028 tinzawn an ni a. October ni 14, 2025-ah Lunglei District-a khaw 157-a hri danna pekna tur hmun (vaccination booth) 199 leh transit point 3 buatsaihah hri danna pek runpui hi buatsaih tum a ni a. Hemi nia pek hman lohte chu October ni 15 leh ni 16-ah te hriselna lama thawktu - health & wellness officer, health worker, ASHA leh Anganwadi worker-te'n in tina kal chilha zawng chhuakin, hri danna hi an pe leh dawn a ni.

Lunglei District-a SNID kalpui tur hi October ni 14, 2025 chawhma dar 10-ah Lungleiah a hawnna hun buatsaih tum a ni a. SNID kalpuina tur khaw 157 zinga khaw 59 chu tlawh pawh harsa zual niin, he'ng khuaa naupang awmte'n zenghri danna hi an lak vek theih nan uluk taka vil leh en zui ni se, tih a ni a. Lunglei DTFI chuan nu leh pate'n zenghri danna pek hi ngai pawimawh a, mahni fate hri danna la rual chu laktir vek turin an ngen.

India rama zenghri vei hmuh chhuah hnuhnun ber chu January ni 13, 2011 kha niin, March ni 27, 2014 khan World Health Organisation (WHO) chuan India chu zenghri awm tawh lohna ram (polio free)-ah a puang tawh a. Hetih lai hian ram ṭhenawmah zenghri hmuh a la nih reng avangin zenghri danna pek hi kalpui chhunzawm zel a ni a. Zenghri ni thei awma rinhlelh sample te pawh endik turin phaiah thawn ṭhin niin, kumin April - August chhung khan sample 3 thawn a ni a. Zenghri erawh hmuh a ni lo.