Mizoram hmun hrang hranga tun hnaia thal zikhlum (off season cabbage) tharchhuahte hralh dan tur ngaihtuahin vawiin khan Commerce & Industries Director Pu J.Hmingthanmawia hovin an Department Conference Hall-ah Agriculture, Horticulture, I&PR, Commerce & Industries (Commerce Wing) officials te bakah Fruits & Vegetables Suppliers’ Assn. leh All Mizoram Farmers’ Union aiawhte an thukhawm.
Commerce & Industries Director Pu J.Hmingthanmawia chuan sorkarin kuthnathawktute hmasawn zelna tur ngaihtuahin an thlai tharte mumal leh man zawka an hralh theihna turin hmalak mek a ni a; chung zingah chuan thal zikhlum pawh a tel thu a sawi a. Tun hnaiah Samthang khuaa thal zikhlum tharchhuahte chu Aizawl bazar-a kharchhawng thinte chu lo fihlim turin ngen an nih hnuah sorkar chuan Commerce & Industries Department kaltlangin heng thla zikhlum man zat leh hralhchhuah dan turtefel takin a bituk ta a ni, a ti. Sorkar a inrawlh hnu chuan Samthang kuthnathawktute chuan an zikhlum tharchhuah atangin a hma aia an hlawk thu leh tuna mumal zawka Samthang zikhlum an rawn phurh leh hralhchhuah ang hian khaw dang atanga zikhlum leh thlai dang hralhchhuahnaah pawh hman zui a fuh a rin thu a sawi bawk.
Vawiina meeting-ah hian Aizawl khawpui chhunga chawhmeh bazarte survey tum a nih thu te, loneitute tan market awareness campaign neih te leh food testing laboratory pawh peih a nih tep thute tarlan a ni a. Thlai tharchhuahte hralhna kawnga hmalakna pawimawh tak chu a dah thatna tur ‘pack house’ sak a nih thu sawi a ni bawk.
Sorkar department ten hma an lakpui atanga vawiin thlenga Samthang-to-Aizawl zikhlum phurh thlen zat chu :
Thlen Ni - Thlen zat
15.8.2017 - 71 bags
16.8.2017 - 45 bags
17.8.2017 - 70 bags
17.8.2017 - 71 bags
18.8.2017 - 41 bags
18.8.2017 - 50 bags
19.8.2017 - 39 bags
22.8.2017 - 90 bags
Aizawl Division bakah Lunglei, Khawzawl, Tuidam, Serchhip, Siaha, Lawngtlai leh Kolasib Division ah te thal zikhlum hi tharchhuah mek a ni.
