Pu H. Rohluna Hon’ble Minister, School Education Department chuan vawiin khan Zirlai Hmeichhiate chhawmdawlna Programme Punjab National Bank-in a duan Punjab National Bank Corporate Social Responsibility Event (PNB LADLI) chu SSA Aizawl District Conference Hall, Chaltlang ah a hmanpui. 

Pu H. Rohluna chuan zirlai hmeichhiate Punjab National Bank atanga an zirna atana pawimawh an dawn avanga an vanneih thu leh Punjab National Bank-in midangte tanpuina rilru pu a, midangte tana an han luang chhuak hi an fakawm tiin, an chungah lawmthu a sawi a. An nihlawhzia hre reng chungin zirlai hmeichhia te chu theihtawpa lehkha zir turin a fuih nghal bawk a,  Zirna hi School ah ringawt ni lovin in lamah te pawh thahnemngai taka zir chhunzawm zel turin a chah bawk a ni. 

Pu K. Gopinathan, DC Aizawl leh District Education Committee Chairman ni bawk chuan thusawina a nei bawk a, Punjab National Bank-in a PNB LADLI hnuaia zirlai hmeichhe naupang tana hamthatna tur a rawn buatsaih thei hi lawmawm a ti hle a, zirlai hmeichhe naupang kalkhawmte hnenah an vanneihzia thu a sawi bawk a. Naupangten hamthatna dawng chhunzawm zel tlak ni tur leh mi hlawhtling an nih ngei theihna turin an zirlai tha taka zir turin a chah bawk a ni. 

He Programme-ah hian Pi Lallianzuali Bawitlung, District Project Coordinator, SSA Aizawl District chu Chairman niin kalkhawmte lo lawmna thu a sawi a. Pu N. Hangsing Senior Manager, Punjab National Bank-in report a pe bawk. 

Punjab National Bank-in a duan Punjab National Bank Corporate Social Responsibility Event (PNB LADLI) Scheme hian Aizawl District-a Middle School zirlai hmeichhia 100 hnenah Class-XII an zir thlenga an zirna atana thil tul a an hman turin kum tin Rs. 2500/- an dawng dawn a, Hemi bakah hian PNB chuan Zirlai Hmeichhia te hi an Bank ah Account hawnsakin kumtin Rs. 1200 /- an thun sak dawn bawk a ni. Zirlai hmeichhia 200 in Solar Lantern an dawng bawk a ni.