Vawiin khan Finance Minister Pu Lalsawta chuan Mizo Students Union (MSU) buatsaih Graduate toppers-te lawmpuina programme chu Lal Thanhawla Auditorium-ah a hmanpui.
Pu Lalsawta chuan zirlai tithate lawmpuiin an hlawhtlinna chapopui lova bul tan mek an ni tih inhre zawk turin a chah. Pi leh pu atanga intodelh hnam ni thin Mizote hi khawvel changkang zelah nasa taka hma kan sawn rual hian kan lo neih dan erawh a ngai reng a, ei khawp thar chhuak chhungkua kan awm ta mang lo, a ti a. Ei leh bar thar chhuah hna hi lehkhathiamlo leh retheite kutah dah lovin kan thiamna chhawr tangkaiin kut hnathawh hmanga milian nih kan tum tur a ni, a ti. Minister Pu Lalsawta chuan Engineer leh Doctor zirchhuak tharte’n sawrkarah hna zawng lova anmahni kutkawih ngeia company leh private hospital an din thei chu an entawntlak hle tiin graduate leh lehkhathiam dangte pawhin kan entawn tur a ni, a ti a. Sawrkar chuan New Economic Development Policy (NEDP) hmangin mi taima leh tumruh, lehkhathiamte hlawhtlinna tura tanpui a tum a. Sawrkar chuan an mamawh intawm, mimala lei zawh si loh, inkalpawhna kawng, electric, tui, kudam, hmanraw lian tham leh thil dangte chhawpchhuakin he policy thar hmang hian hmasawnna rahbi thar kai kan tum a ni, a ti.
MSU President Pu PC Lalrinhlua pawhin thu sawiin zirlai tithate chu nakin lawka ram hruaitu tur an la ni dawn tih hriain dik tak leh rinawm taka ram tana thawk turin kan hual lawk a ni, a ti.
Mizoram University 2016 result chhuakah subject hrang hrang topper mi 22 hnenah chawimawin an hlan a. Chawimawina hlan tak te hi B.Com - Samuel Lalthanliana, Govt. Hrangbana College (HBC); Home Science - Rodingliani, Govt. Zirtiri Residential Science College (GZRSC); Economics - Joseph Vanlaldingngheta, Govt Aizawl College (GAC); Education - Caroline Lalrinpuii, GAC; English - Lalrinzuali Sailo, Pachhunga University College (PUC); Geography - Samson MC Laldinthanga, PUC; History - Gospel Zoramengi, HBC; Mizo - Vanlalhlana, HBC; Philosophy - John C. Zonunmawia, PUC; Pol. Science - Ramengliana, PUC; Psychology - Joseph Lalrindika, PUC; Public Administration - John Hualhmingthanga, Govt. Aizawl West College (GAWC); Sociology - Thawmsanglian, PUC; Bio-Technology - Lalthafala, PUC; Botany - Augusta Lalhmangaihzuali, Lunglei Govt. College (LGC); Chemistry - ZT Laldinpuii, PUC; EVS - C. Zosangzuala, PUC; Geology - Benjamin Roluahpuia, PUC; Mathematics - Lalliandinga, PUC; Physic - R. Lalnuntluanga, PUC; Statistics - H. Lalrinsangi, PUC leh Zoology - Lalrinsangi, PUC te an ni.
Zirlai 22 te hnenah hian chawimawina thuziak leh lehkhabu pathum theuh pek an ni a. Anni bakah hian Mizo hmeichhe zinga Mt.Everest lawnchhuak hmasa ber Lalrintluangi hnenah MSU te hian chawimawina thuziak an hlan bawk.
